पर्याप्त बहुमतसहित जोनसन अर्काे कार्यकालका लागि प्रधानमन्त्री बन्ने भएपछि युरोपेली युनियनबाट बेलायत बाहिरिने पक्का भएको छ।
नतिजा घोषणा भएसँगै प्रधानमन्त्री जोनसनले नयाँ जनादेश मिलेको र आफूले बेलायतलाई आगामी महिना यूरोपेली संघबाट बाहिर ल्याउने ब्रेजिक्ट डील लागू गर्नसक्ने र बेलायतलाई एकजुट गर्न सक्ने बताएका छन् ।
६५० वटा सीट रहेको संसदमा कन्जरभेटिभ पार्टीले बहुमतका लागि आवश्यक ३२६ सीटको आँकडा पार गरेको छ भने करिब ३६४ सिट जित्ने देखिएको छ । लेबरले २०३ र एसएनपीले ४८ लिबरल डेमोक्रेट्सले १२ सिट जितेका छन् ।
कन्जरभेटिव पार्टीका लागि यो सन् १९८७ मा मार्गरेट थ्याचरले हासिल गरेको विजयपछिको सबैभन्दा ठूलो सफलता हो ।
निर्वाचनमा पार्टी हारेपछि विपक्षी लेबर पार्टीका नेता जेरेमी कोर्बिनले अर्काे चुनावको नेतृत्व आफूले नगर्ने घोषणा गरेका छन् । यद्यपि आफू केही समय पार्टी नेतृत्वमा रहने उनले बताएका छन् ।
