सम्झौतामा हस्ताक्षर भएसँगै बुधबार अमेरिकी शेयर बजार सूचकमा तीव्र वृद्धि देखियो । डउ सूचक पहिलोपटक २९ हजार को बिन्दु पार गरेर बन्द भएको थियो । यसैगरी एसएण्डपी ५०० सूचक ०.२ प्रतिशत बढोत्तरीका साथ ३ हजार २८९ को बिन्दुमा पुगेको थियो भने नास्डेक इन्डेक्स ०.८ प्रतिशतले बढेपनि बजार बन्द हुने समयमा ९ हजार २५८ को बिन्दुमा स्थिर रह्यो ।
बिहीबार भारतीय शेयर बजार परिसूचक सेन्सेक्सले पनि पहिलोपटक ४२ हजार पार गरेको छ । सेन्सेक्स सूचक १८५ अंकले बढेर ४२ हजार ०५८.०१ को बिन्दुमा पुगेको छ भने निफ्टी पनि ४६ अंकले बढेर १२ हजार ३८९.०५ को बिन्दुमा पुगेर नयाँ रेकर्ड कायम गरेको छ । दुवै सूचक पहिलोपटक उच्च बिन्दुमा पुगेका हुन् ।
योसँगै बिहीबार जापानको निक्केई इन्डेक्स ०.१४ प्रतिशतले बढेको छ भने एशियाका अन्य सूचक पनि उच्च रुपले बढेका छन् ।
बुधबार अमेरिका–चीनका बीच पहिलो चरणको व्यापार सम्झौतामा हस्ताक्षर भएसँगै दुई देशका बीच चलेको लामो व्यापार युद्ध समाप्त हुने अपेक्षासँगै लगानीकर्ताहरु आशावादी भएको र यसबाट एशिया सहित विश्वका अधिकांश शेयर बजारमा बढोत्तरी देखिएको बताइएको छ ।
अमेरिकी राष्ट्रपति डोनाल्ड ट्रम्प र चीनका भाइस प्रिमियर लिउ हि ले पहिलो चरणको व्यापार सम्झौतामा हस्ताक्षर गरेका हुन् । सम्झौतासँगै दुवै देशले यसअघि एक अर्काको देशबाट हुने आयातित सामानमा लगाइएको केही शुल्क फिर्ता लिएका छन् ।
दुई देशका बीचको व्यापार युद्धले विश्व अर्थतन्त्रलाई नै लामो समयदेखि प्रभाव पारिरहेको थियो । दुई देशका बीचको तनावको अवस्थाले विश्व अर्थतन्त्र नै सुस्ताइरहेको र यसले विश्व अर्थतन्त्रलाई दीर्घकालीन असर गर्ने विश्लेषणहरु हुदैँ आएका थिए । एजेन्सी
