कारोना भाइरसका कारण लगातार बढेर उच्च विन्दुमा पुगेको सुनको भाउ गत बुधबारदेखि घट्न थालेको थियो।
फागुन ३० गते शुक्रबार मात्र सुन तोलामा ३ हजार रुपैयाँले घटेको छ। यस दिन छापावाला सुन प्रतितोला ७८ हजार ५०० र तेजाबी सुन प्रतितोला ७८ हजार २०० रुपैयाँमा कारोबार भइरहेको नेपाल सुनचाँदी व्यवसायी महासँघले जनाएको छ।
त्यसैगरी, शुक्रबार चाँदीको भाउ पनि ह्वातै घटेको छ। चाँदी तोलामा ४० रुपैयाँले घटेर प्रतितोला ८२० रुपैयाँमा खरिद बिक्री भइरहेको महासँघले जनाएको छ।
कोरोना भाइरसको कारण अन्तरराष्ट्रिय क्षेत्रमा आर्थिक मन्दि शुरु भएको छ। जसको कारणले गर्दा शेयर मार्केट घटेको छ। तर डलरको भाउ भने बढेको छ।
लगानीकर्ताहरुले सुनभन्दा डलरमा लगानी बढाउदा सुनमा बिक्री चाप बढेको छ। सुनमा आएको बिक्री चापले गर्दा अन्तरराष्ट्रिय बजारमा सुनको भाउ घटेको छ जसले गर्दा नेपालमा पनि सुनको भाउ घटेको सुनचाँदी व्यवसायी तेज रत्न शाक्य बताउछन्।
बिश्व शेयर बजारमा कोरोना भाइरसको असर पहिले देखिनै देखिदै आएकोमा पछिल्लो समय सुनमा पनि उक्त असर देखिएको शाक्यले बताए।