कोरोना भाइरस असरको न्युनिकरणको लागि लकडाउन गरिएपश्चात त्यसको प्रत्यक्ष प्रभाव लघुवित्त कम्पनीहरुमा पनि देखिएको छ। लकडाउनका कारण कर्जा असुली लगायतका कामहरु ठप्प हुदा संस्थाको लक्ष्यअनुसार प्रगति हुन नसकेको कम्पनीले जनाएको छ।
चैत मसान्तसम्ममा लघुवित्तले ६६ करोड ७६ लाख रुपैयाँ खुद ब्याज आम्दानी गरेको छ। गत वर्षको यसै अवधिमा लघुवित्तले ५८ करोड ४० लाख रुपैयाँ खुद ब्याज आम्दानी गरेको थियो। सञ्चालन नाफा भने ३८ करोड रुपैयाँबाट घटेर २६ करोड रुपैयाँमा झरेको छ। यो अघिल्लो त्रैमासकोभन्दा पनि कम हो।
समीक्षा अवधिमा लघुवित्तले ४ अर्ब ८९ करोड रुपैयाँ निक्षेप संकलन गरी १२ अर्ब ६ करोड रुपैयाँ कर्जा लगानी गरेको छ। गत वर्षको यसै अवधिमा लघुवित्तको निक्षेप संकलन ३ अर्ब ३४ करोड रुपैयाँ र कर्जा लगानी १० अर्ब ६३ करोड रुपैयाँ रहेको थियो।
यस अवधिमा लघुवित्तको खराब कर्जा पनि ह्वातै बढेको छ। गत वषको यसै अवधिमा ०.८८ प्रतिशत रहेको खराब कर्जा बढेर २.५८ प्रतिशत पुगेको छ। त्यसैगरी, लघुवित्तको कर्मचारी खर्च र गैर सञ्चालन खर्चहरुमा पनि उल्लेख्य वृद्धि भएको देखिन्छ।
एक अर्ब रुपैयाँ चुक्ता पूँजी रहेको लघुवित्तको जगेडा कोषमा ८२ करोड ३८ लाख रुपैयाँ रहेको छ। प्रतिशेयर आम्दानी ३४ रुपैयाँ ४ पैसा रहेको लघुवित्तको प्रतिशेयर नेटवर्थ १६३ रुपैयाँ ९४ पैसा र मूल्य आम्दानी अनुपात २१.६६ गुणा रहेको छ।
