साताको पहिलो दिन आइतबार बिहान ११ बजेर १५ मिनेट देखि २० मिनेटको अन्तरालमा कारोबारमा समस्या देखिने गरेको छ। सोही समस्या आज पनि दोहोरिन्छ कि भन्ने उनिहरुको अनुमान छ। "हरेक आइतबार ११ बजेर २० मिनेटमा कारोबारमा समस्या देखिने गरेको छ। आज पनि त्यो समस्या दोहोरिन्छ भन्ने हाम्रो अनुमान छ" नियमित कारोबारी एक लगानीकर्ताले मेरो लगानी सँग भने।
हरेक आइतबार देखिने समस्याको बारेमा नियामक निकाय पनि सुसूचित छ। उसले भने दुई बजेको समयलाई ख्याल गरेको जनाएको छ। हरेक हप्ता एकै समयमा देखिने समस्यालाई आशङ्का पूर्वक हेर्न थालिएको छ। कसैले नियोजित रुपमा समय फिक्स गरे जस्तो गरी एकै समयमा हुने गडबडी रहस्यपूर्ण रहेको बोर्डको ठम्याइ छ।
एकै प्रकृतिको र निश्चित समयको बारेमा बोर्डले अनौपचारिक रुपमा नेप्से सँग कुरा पनि राखिसकेको हो। तर नेपाल स्टक एक्सचेन्ज(नेप्से)ले भने उक्त विषयलाई संयोग भनेको छ। "यो एक संयोग मात्रै हो। हरेक पटक फरक फरक समस्या देखिएका छन्। तर संयोग भने एकै समयको परेको छ" नेप्सेका प्राबिधिक शाखाका एक अधिकारीले भने। उक्त समस्या आजको कारोबारमा नदेखिने ती अधिकारीको दाबी छ। "सम्पूर्ण समस्या समाधान भएका छन्। उक्त समस्या आज दोहोरिँदैन" ती अधिकारीले भने ।