मंगलबार नेप्से सूचक १.६७ प्रतिशत अर्थात २९.६८ अंकले बढेर १८१०.११ विन्दुमा पुगेको छ। यस्तै सेन्सेटिभ इन्डेक्स ४.१२ अंकले बढेर ३४९.३७ विन्दुमा पुगेको छ।
यस दिन १९६ वटा कम्पनीको १ करोड १७ लाख कित्ता शेयर ५ अर्ब ४४ करोड रुपैयाँमा खरिद बिक्री भएको छ।
मंगलबार कारोबारमा आएका १२ वटा उपसमूहहरुमध्ये होटल उपसमूहको सूचक नकारात्मक देखिएको छ भने बाँकी ११ वटा उपसमूहको सूचक सकारात्मक देखिएको छ।
- आठ कम्पनीको शेयरमूल्य सर्किट लेभलमा कारोबार
यस दिन आठ वटा कम्पनीको शेयर सर्किट लेभलमा कारोबार भएको छ। बोटलर्स नेपालको शेयरमूल्य सबैभन्दा धेरै ९.९९ प्रतिशतले बढेको छ भने हिमालयन डिस्टिलरीको ९.९८ प्रतिशत, बिशाल बजार कम्पनीको ९.९५ प्रतिशत, आँखुखोला हाइड्रोपावरको ९.९२ प्रतिशत, मल्टिपर्पस फाइनान्सको ९.८७ प्रतिशत, अजोड इन्स्योरेन्सको ९.८६ प्रतिशत, ङ्यादी ग्रुप पावरको ९.७३ प्रतिशत र नेको इन्स्योरेन्सको ९ प्रतिशतले बढेको छ।
त्यस्तै, सोल्टी होटलको शेयरमूल्य सबैभन्दा धेरै ३.२० प्रतिशतले घटेको छ भने सप्तकोशी डेभलपमेन्ट बैंकको ३.०७ प्रतिशत, जानकी फाइनान्सको २.६५ प्रतिशत र युनिलिभरको २ प्रतिशतले घटेको छ।
मंगलबार एनआइसी एशिया बैंकको सबैभन्दा धेरै ३७ करोड ३३ लाख रुपैयाँ बराबरको शेयर कारोबार भएको छ भने नेपाल दुरसञ्चार कम्पनीको २८ करोड ५१ लाख, नेपाल पुनर्बीमा कम्पनीको २५ करोड ८२ लाख र हिमालयन डिस्टिलरीको २० करोड ९४ लाख रुपैयाँ बराबरको शेयर कारोबार भएको छ।
यस दिन कारोबारमा आएका १२४ वटा कम्पनीको शेयरमूल्य बढेको छ भने ३५ वटा कम्पनीको शेयरमूल्य घटेको छ। १३ वटा कम्पनीको शेयरमूल्यमा भने कुनै परिवर्तन भएन।