फोरजी देशैभर नपुगेको अबस्थामा फाइभजी प्रविधि भित्र्याउन रोक्न नहुँने भन्दै नेपालका चार शहरबाट पहिलो चरणमा फाइबजी परिक्षण गरिने भएको हो ।
यो वर्ष भित्र नै फाइभजी सेवाको परीक्षण गर्न तयारी भएको सञ्चार तथा सूचना प्रविधि मन्त्री पार्वत गुरुङले बताएका छन् ।
सञ्चार मन्त्रालयका अनुसार काठमाडौं पोखरा, भैरहवा र विराटनगरमा पहिलो चरण फाइभजी परिक्षण हुने छन । मन्त्री गुरुङ्गले विश्वभर फाइभजी प्रविधिको प्रयोग बढिरहेको भन्दै विश्व बजारमा प्रतिस्पर्धा गर्नपनि फाइभजीमा जानुको विकल्प नभएको बताए ।
‘फोरजी नै कतिपय स्थानमा अपरेसनमा नआएको बेला फाइभजी किन भन्ने प्रश्न होला। तर विश्व प्रतिस्पर्धामा सकेपनि नसकेपनि दौडनै पर्दछ,’ मन्त्री गुरुङले भने ।
त्यसैगरि प्राधिकरणका अध्यक्ष पुरुषोत्तम खनालले पनि फाइभजी सेवा प्रयोग गर्ने गरी स्पेक्ट्रम सुनिश्चित गर्ने बताए । उनले आगामी वर्ष नै सेवा प्रदायकहरुलाई फाइभजी फ्रिक्वेन्सी उपलब्ध गराउने बताए ।
नेपाल टेलिकमले यसअघि नै फाइभजी सेवा परीक्षणको लागि आफूहरु तयार रहेको बताउँदै आएको छ । त्यसैगरी प्राधिकरणले पनि फाइभजी फ्रिक्वेन्सी खुला गर्नका लागि रेडियो फ्रिक्वेन्सी सेवा समितिमा सिफारिस गरिसकेको छ ।