गत आर्थिक वर्षको अन्त्यसम्ममा कम्पनीले २८ करोड ९७ लाख रुपैयाँ खुद नाफा आर्जन गरेको छ। जुन अघिल्लो आर्थिक वर्षको सोही अवधिको तुलनामा १६८.३८ प्रतिशत बढेको हो।
विद्युत बिक्री आम्दानी बढेसँगै खर्च नियन्त्रण गर्न सफल भएका कारण कम्पनीको खुद नाफामा उल्लेख्य सुधार देखिएको हो।
समीक्षा अवधिमा कम्पनीको विद्युत बिक्री आम्दानी ७३.५५ प्रतिशत बढेको छ। त्यसैगरी, कम्पनीको जम्मा आम्दानी ६९.१० प्रतिशत बढेको छ भने सञ्चालन मुनाफा ६५.०५ प्रतिशत बढेको छ।
गत आर्थिक वर्षमा ५.७१ प्रतिशत बोनस शेयर वितरण गरी चुक्ता पूँजी १ अर्ब ५८ करोड रुपैयाँ पुर्याएको यस कम्पनीको जगेडा कोष समीक्षा अवधिमा २१६.०७ प्रतिशत बढेको छ।
चुक्ता पूँजीको तुलनामा खुद नाफा धेरै बढेपछि कम्पनीको प्रतिशेयर आम्दानी पनि बढेको छ। समीक्षा अवधिमा कम्पनीको प्रतिशेयर आम्दानी ११ रुपैयाँ ८ पैसा बढेर १८ रुपैयाँ २८ पैसा पुगेको छ। त्यसैगरी, सो अवधिसम्ममा कम्पनीको प्रतिशेयर नेटवर्थ ११८ रुपैयाँ ४३ पैसा रहेको छ भने मूल्य आम्दानी अनुपात २५.९४ गुणा रहेको छ।
