पछिल्लाे एक महिनादेखि लगातार करेक्सनमा देखिएको नेप्से सूचक मंगलबारदेखि भने बढ्न थालेको छ। उच्च विन्दुबाट ६०० अंकभन्दा धेरै घटिसकेको नेप्से सूचक मंगलबार ४१ अंकले बढेको थियो भने बुधबार पनि सो वृद्धिलाई निरन्तरता दिएको छ।

बुधबार नेप्से सूचक ६८.४७ अंकले बढेर २६८१.११ विन्दुमा पुगेको छ भने सेन्सेटिभ सूचक पनि १२.७२ अंकले बढेको छ। बुधबार नेप्सेमा बिक्रीकर्ताभन्दा धेरै खरिदकर्ता हाबी देखिन्थे जसले गर्दा नेप्से सूचकमा ठूलो उतारचढाव देखिएन।

यस दिन कारोबार रकममा पनि सुधार देखिएको छ। मंगलबार ३ अर्बभन्दा कमको शेयर कारोबार भएकोमा बुधबार साढे ४ अर्ब रुपैयाँको कारोबार भएको छ। यस दिन ४ अर्ब ५० करोड ६ लाख ५८ हजार १४१ रुपैयाँ बराबरको ८१ लाख ८९ हजार ८९० कित्ता शेयर कारोबार भएको छ।

• १९ कम्पनीको शेयर सकारात्मक सर्किट लेभलमा कारोबार

बुधबार कारोबारमा आएका १९ कम्पनीको शेयर सकारात्मक सर्किट लेभलमा कारोबार भएको छ। उच्च दरले बढ्ने कम्पनीमा अधिकाँश विकास बैंक, फाइनान्स र माइक्रोफाइनान्स रहेका छन्।

यस दिन बेष्ट फाइनान्स, प्रोग्रेशिभ फाइनान्स, ग्रामिण विकास लघुवित्त, नयाँ सारथी लघुवित्त, मिथिला लघुवित्त, किसान लघुवित्तलगायतका कम्पनीको शेयर १० प्रतिशतले बढेको छ।

यता रिडि हाइड्रोपावर कम्पनीको शेयरमूल्य सबैभन्दा धेरै २.१६ प्रतिशतले घटेको छ भने ङादी ग्रुप पावरको १.४६ प्रतिशत, सिनर्जी पावरको ०.२४ प्रतिशत, एनआइसी एशिया लघुवित्तको ०.१८ प्रतिशत र सिभिल बैंकको ०.०४ प्रतिशतले घटेको छ।

बुधबार सिटिजन्स बैंकको सबैभन्दा धेरै २३ करोड ४ लाख रुपैयाँ बराबरको शेयर कारोबार भएको छ भने एनआइसी एशिया लघुवित्तको १६ करोड ८५ लाख, निर्धन उत्थानको १६ करोड ७८ लाख, हिमालयन डिस्टिलरीको १४ करोड ७५ लाख, छिमेक लघुवित्तको ११ करोड १८ लाख र नेपाल बैंकको १० करोड ६३ लाख रुपैयाँ बराबरको शेयर कारोबार भएको छ।

यस दिन फाइनान्स कम्पनीमा लगानीकर्ताको बढी आकर्षण देखिएको छ भने माइक्रोफाइनान्स र विकास बैंकमा पनि आकर्षण धेरै नै छ।

बुधबार कारोबारमा आएका १३ उपसमूहमा सबै उपसमूहको सूचक सकारात्मक देखिएको छ। जसमा फाइनान्स उपसमूहको सूचक सबैभन्दा धेरै ६.५९ प्रतिशतले बढेको छ भने माइक्रोफाइनान्स उपसमूहको सूचक ५.८० प्रतिशत र विकास बेंक उपसमूहको सूचक ४.८२ प्रतिशतले बढेको छ।