बीमा कम्पनीहरुले कोरोना बीमा दाबी भुक्तानी मोडालिटी अनुसार पहिलो चरणमा व्यक्ति तथा परिवारलाई पहिलो प्राथमिकता दिइएको छ । प्राधिकरणले पनि पिसिआर परीक्षणको रिपोर्टको आधारमा व्यक्ति तथा परिवारलाई भुक्तानी गर्न निर्देशन दिएको छ ।
व्यक्ति तथा परिवारको बीमा गरेका २५ हजार ८४ वटा दाबी रहेको नेपाल बीमक संघले जनाएको छ । त्यस मध्येपछि पहिलो चरणमा १८ हजार ६० वटाको मात्रै दाबी भुक्तानी हुनेछ । यो व्यक्ति तथा परिवार बीमाको कुल दाबीको ७२ प्रतिशत हुन आउँछ ।
निर्जीवन बीमा कम्पनीहरुले पहिलोचरणमा १८ हजार ८४ वटा दाबी वापत १ अर्ब ८१ करोड ८१ लाख रुपैयाँ भुक्तानी गर्नेछ ।
बीमक संघको तथ्यांक अनुसार सबै भन्दा धेरै शिखर इन्स्योरेन्सले ३ हजार ६१४ वटाको दाबी भुक्तानी गर्नेछ ।
त्यसपछि राष्ट्रिय बीमा कम्पनीले १ हजार ८६३ वटा, नेको इन्स्योरेन्सले एक हजार ६६५ वटा, सगरमाथा इन्स्योरेन्सले १ हजार ५४२ वटा, अजोड इन्स्योरेन्स १ हजार ३५५ वटा र हिमालयन जनरल इन्स्योरेन्सले १ हजार २५९ वटा बीमालेखको दाबी भुक्तानी हुनेछ ।
बीमक संघले नेपाल पूनर्बीमा कम्पनीबाट भने हालसम्म रकम प्राप्त नभएको जनाएको छ । नेपाल पुनर्बीमा कम्पनीबाट रकम प्राप्त भए पश्चात रकम पूनः बाँडफाँड गर्ने गरी संलग्न बमोजिमको चेक बुझिलिई कम्पनीले थप गर्नुपर्ने २ करोड २७ लाख २७ हजार २७२ रुपैयाँ रकम थपि दावी भुक्तानी प्रकृया शुरु गर्न निर्जीवन बीमा कम्पनीलाई आग्रह गरेको थियो ।
बीमक संघमा भएको थप निर्णयको आधारमा रकम बाँडफाँड गर्दा केहि कम्पनीहरुले थप गर्नु पर्ने रकम नै अत्याधिक भएकोले सो रकमबाट नै दावी भूक्तानी गर्न समेत संघले आग्रह गरेको छ ।
पहिलाे चरणकाे दाबी भुक्तानी सकिएपछि मात्रै दोस्रो चरणमा राष्ट्र सेवक कर्मचारी र संघ संस्थाले बीमाशुल्क तिरेर कोरोना बीमा गर्नेहरुले दाबी भुक्तानी पाउनेछन्।
