गम्भीर घाइते हुनेमा भारतका २९ वर्षिय मनु उर्वा रहेका छन् । कारखानामा कार्यरत उर्वालाई उपचारका लागि भक्तपुरस्थित डा. ईवामुरा अस्पताल लगिएको थियाे । त्यसपछि कीर्तिपुर अस्पतालमा रिफर गरिएपछि उनलाई राति साढे १ बजे अस्पताल लगिएको थियाे ।
यस्तै, अर्का घाइते रामेछापका लिखु तामाकोशी गाउँपालिका- ६ का २३ वर्षिय बुद्धनारायण श्रेष्ठ हुन् । अहिले भक्तपुरको दुवाकोट निवासी उनी सामान्य घाइते हुन् ।
शनिबार राति १२ बजे ज्योति प्लाई कार्पेट कारखानामा आगो लागेको थियो । आगो नियन्त्रण गर्न भक्तपुर, काठमाडौं, ललितपुर र काभ्रेका ७ वटा दमकल र चार वटा पानी ट्यांकर प्रयोग गरिएको थियो । नेपाल प्रहरीका ४७ जना र सशस्त्र प्रहरीको १३ जनाको टोली समेत खटिएकाे थियाे । भक्तपुर प्रहरीका अनुसार आज बिहान ४ बजे आगो नियन्त्रणमा लिइएकाे थियाे ।यद्धपी अहिलेसम्म पनि आगो पूर्णरुपमा ननिभेको प्रहरीले जानकारी दिएकाे छ ।
सन्तोषमान श्रेष्ठ सन्चालक रहेकाे कारखानामा आगाे लाग्दा १ करोड ८० लाख रुपैयाँ बराबरको बराबरको क्षति भएको बताइएकाे छ ।