निरन्तर रुपमा घटेको बजार पछिल्लो समय १९ सय देखि २१ सय माथिको विन्दु वरपर रहेको छ । एउटै प्रकृतिको बजारकाे गतिले लगानीकर्तामा निराशा छाएको छ ।
शेयर बजारमा घट्बढ हुनु स्वभाविक प्रकृया हो । तर नेप्से सूचक सधैँ उस्तै प्रकृतिमा चल्दा लगानीकर्तामा अन्योल छाएकाे छ । पछिल्लो समय बजार बढ्ने आशा छैन । सूचकमा समान्य सुधार भयो की शेयर बिक्री गरेर बाहिरिने दाउमा लगानीकर्ता लागेका छन् यसले बजारप्रति लगानीकर्ताको चरम निराशा रहेको प्रष्ट पारेको छ ।
पछिल्लो एक वर्षदेखि बैंक तथा वित्तीय संस्थाको ब्याजदर निरन्तर रुपमा घट्दो क्रममा रहेको छ । बैंक तथा वित्तीय संस्थामा पर्याप्त तरलता छ । तर शेयर बजारले गति लिन सकेको छैन । शेयर बजारमा आउने कर्जालाई सिमा लगाउँदा बैंकको पैसाको उचित परिचालन हुन नसकेको देखिन्छ । यसको लागि नेपाल राष्ट्र बैंकले शेयर कर्जामा लगाएको सीमा हटाउनु पर्ने लगानीकर्ताहरुको जोड छ।
‘बजार बलियो भएर बढ्न वा घट्नको लागि समय लिने लगानीकर्ता उपेन्द्र पाठकको बुझाई छ । ब्याजदर घटयो भन्दैमा बजार बढ्दैन । बजार बढ्नको लागि केही समय लिन्छ । तत्काल प्रतिकृया जनाएको बजार दीर्घकालीन हुँदैन । अहिले निरन्तर घट्दो अवस्थामा रहेको ब्याजदर एकल अंकमा झर्दैछ । ब्याजदर अझै घट्ने हो । लगानीकर्ताहरु कर्जामा एकल अंकको ब्याजदर पर्खेर बसेका छन्’ पाठकले भने ।
वर्षैादेखि बजारलाई अप्ठेरो पार्ने नीति परिमार्जनका लागि लगानीकर्ताहरु जोड दिँदै गर्दा सरोकारवालाले परिमार्जनको लागि कुनै चासो दिएका छैनन् । बजार निरन्तर रुपमा झर्नुमा सरकार र मातहतका निकायनै प्रमुख दोषी रहेको लगानीकर्ताहरुको आरोप छ ।
त्यसैगरी,आईपिओको नाममा बजारमा शेयर सप्लाई आउनुले पनि बजारलाई उठ्न नदिएको लगानीकर्ता केशव कोईराला बताउँछन् । कमजोर वित्तीय अवस्था रहेका कम्पनीहरुलाई पनि प्रिमियम मार्फत बजारमा छिराउँदा बजारको पैसा बाहिरिएको उनको आरोप छ । सरकारको नीतिले बजारमा दवाव त परेकै छ । तर लगानीकर्ताहरु पनि अनुसाशित नहुँदा बजारले बलियो गति लिन सकेको छैन । कमजोर कम्पनीमा लगानी गर्ने,थोरै नाफा आउनाका साथै नाफा सुरक्षित गर्ने,वित्तीय अवस्था नकारात्मक होस तर थोरै पुँजी भएका कम्पनीमा लगानी गर्ने प्रवृतिले बजार स्थिर भएन । बजारमा यस्तो गतिविधि नरोकिएसम्म बजारको अवस्था यस्तै हुने कोईरालाको बुझाई छ ।
