ब्राजिलको दक्षिणी राज्य रियो ग्रान्डो डो सुलमा भारी वर्षापछि आएको बाढीका कारण मृत्यु हुनेको संख्या ७५ पुगेको छ । स्थानीय अधिकारीका अनुसार १०३ जना अझै बेपत्ता छन् । एक साता यता बाढीले ८८ हजार भन्दा धेरै मानिस विस्थापित भएका छन् ।

यसैगरी,करिब १६ हजार मानिसहरुले विद्यालय,अन्य अस्थायी शिविरमा आश्रय लिएका छन्। यसैबीच, राज्यका गभर्नर एडुआर्डो लेइटले उनीहरूले सामना गरिरहेको विनाश अभूतपूर्व रहेकाे बताए। रिपोर्टका अनुसार राष्ट्रपति लुइज इनासियो लुला दा सिल्भाले आइतबार दोस्रो पटक प्रभावित राज्यको भ्रमण गरेका छन्। साे अवधिमा रक्षामन्त्री जोसे मुसियो,अर्थमन्त्री फर्नान्डो हडाड र वातावरणमन्त्री मारिना सिल्भा पनि उनीसँगै थिए।

बाढीका कारण ब्राजिलकाे जीवन पुरै प्रभावित बनेकाे छ । बाढीका कारण राज्यका विभिन्न ठाउँमा पहिरो,सडकहरु बग्ने र पुलहरु भत्किएका छन् । यहाँ आठ लाखभन्दा बढी मानिस खानेपानीको अभावमा बाँच्न बाध्य भएका छन् ।

गभर्नर एडुआर्डो लेइटले यसअघि राज्यलाई पुनर्निर्माणका लागि ‘मार्शल प्लान’ आवश्यक पर्ने बताएका थिए ।

राजधानी पोर्टो एलेग्रे डुबानमा

करिब एक सातादेखि परेको अविरल वर्षाले हालसम्म २८१ नगरपालिका प्रभावित भएको ब्राजिलस्थित प्राधिकरणले जनाएको छ । ब्राजिलको राजधानी पोर्टो एलेग्रे लगभग पानीमा डुबेको छ। राज्यका गभर्नर एडुआर्डो लेइटले भने, 'हामी घटनास्थलमा पुगेर बेपत्ता भएका अन्य व्यक्तिहरूलाई खाेज्नेछाैँ जसकारण यी संख्याहरू आउने दिनहरूमा परिवर्तन हुन सक्छ।'

राष्ट्रपतिद्वारा सहयोगका लागि कार्यालय खोल्न निर्देशन

ब्राजिलका राष्ट्रपति लुइज इनासियो लुला दा सिल्भाले उद्धार कार्यमा सहयोग गर्न राष्ट्रिय बल, एक विशिष्ट प्रहरी बलका १०० सदस्यहरू पठाएका थिए। त्यसपछि उनले प्राविधिक र आर्थिक सहयोगको लागि पोर्टो एलेग्रेमा आपतकालीन कार्यालय खोल्न आदेश दिएका थिए। 

रियो ग्रान्डे डो सुल दक्षिणी साझा बजार (मर्कोसुर)को प्रमुख हब हो र ब्राजिलमा चामल, भटमास र मासुको मुख्य उत्पादकहरू मध्ये एक हो । यस सहरकाे अर्थव्यवस्था मौसमको कारण एक सातादेखि अवरुद्ध भएको छ।

१९४१ को ऐतिहासिक बाढी भन्दा बढि असर

ब्राजिलमा एक वर्षमा यो चौथो प्रकोप हो। यसअघि सन् २०२३ मा जुलाई, सेप्टेम्बर र नोभेम्बरमा आएको बाढीमा ७५ जनाको ज्यान गएको थियो । ब्राजिलियन जियोलोजिकल सर्भिसका अनुसार राज्यमा आएको याे बाढीले सन् १९४१ को बाढीभन्दा पनि बढि असर गरेकाे छ। बाढीका कारण राज्यभर विद्युत, सञ्चार सेवा र खानेपानी सेवा अवरुद्ध भएको उनले बताए ।

जलवायु परिवर्तनको प्रभाव

विज्ञहरूले बाढी र माटो स्लाइडहरू अब ब्राजिलको ढाँचाको हिस्सा बनेको विश्वास गरेका छन्। उनका अनुसार यसको प्रमुख कारण जलवायु परिवर्तन नै हो । ब्राजिलका राष्ट्रपति लुला डा सिल्भाले बाढी प्रभावित क्षेत्रको भ्रमण गरी केन्द्र सरकारबाट सहयोगको आश्वासन दिएका छन् । उनले बाढी र वर्षाका लागि जलवायु परिवर्तनलाई पनि दोष दिएका छन् । ब्राजिलको मौसम विभागले पनि भारी वर्षाको लागि एल निनो जिम्मेवार रहेको बताएको छ।

एजेन्सीकेा सहयाेगमा ।