गत आर्थिक वर्षभरिमा ७७ करोड रुपैयाँ बराबरको सिमेन्ट निर्यात भएकोमा चालु आवको ९ महिनामै ३.८५ गुणा सिमेन्ट निर्यात भइसकेको छ । गत वर्ष चैत्र मसान्तसम्म करोड ४२ करोड ३१ लाख रूपैयाँको मात्रै सिमेन्ट निर्यात भएको थियो। चैत्र महिनामा मात्रै नेपालले ५० करोड २९ लाख रुपैयाँ बराबरको सिमेन्ट र क्लिकर निर्यात गरेको थियो ।हाल नेपालबाट पाल्पा, अर्घाखाँची, सर्वोत्तम, सिजी, बालाजी,बाहुबली र श्रृष्टि ब्रान्डका नेपाली सिमेन्ट भारतीय बजारमा निर्यात गरिरहेका छन्।
चालु वर्षको ९ महिनामा तयारी सिमेन्ट मात्रै १ अर्ब ४९ करोड ५६ लाख रुपैयाँ बराबरको २० लाख ७० हजार ४ सय ७३ टन सिमेन्ट निर्यात भएको छ । त्यस्तै १ अर्ब ४७ करोड ८९ लाख रूपैयाँ बराबरको ४ लाख ३९ हजार १ सय ५ टन क्लिंकर समेत भारत निर्यात भएको छ।
तयारी सिमेन्टको व्यावसायिक निर्यात २०७९ साउनबाट पाल्पा सिमेन्टले सुरू गरेको थियो। पहिलो महिना जम्मा ४९ लाख रूपैयाँको निर्यात भएको थियो। क्लिंकर निर्यात भने सोही वर्ष फागुनबाट सुरू भएको हो। छोटो समयमा सिमेन्टको निर्यात वृद्धिदर उल्लेखनीय रूपमा बढेको छ। सरकारले स्वदेशी वस्तु निर्यातलाई प्रोत्साहन गरेपछि भारतीय सीमावर्ती क्षेत्रमा सिमेन्ट–क्लिंकर निर्यात बढ्न थालेको हो।
सिमेन्टलाई चाहिने प्रमुख कच्चापदार्थ चुनढुंगा खानी नेपालमा प्रशस्त हुनु सिमेन्ट उद्योग फस्टाउनुको प्रमुख कारण हो। पहिले चुनढुंगा उत्खनन गर्न उद्योगहरूसँग लगानी र प्रविधि पर्याप्त थिएन। खानी उत्खननसम्बन्धी सरकारी नीति पनि कडा थियो। त्यसैले उद्योगीहरू भारतबाट क्लिंकर आयात गर्थे। खानी तथा भूगर्भ विभागले चुनढुंगा खानीको लाइसेन्स जारी गरेपछि क्लिंकर आयात कम हुँदै गएको हो।
सरकारले स्वदेशी वस्तु निर्यात गर्ने उद्योगलाई आठ प्रतिशतसम्म नगद अनुदान र १० करोड रूपैयाँभन्दा बढीको विद्युत खपत गर्ने उद्योगलाई महसुलमा १५ प्रतिशतसम्म छुट दिने व्यवस्था पनि गरेको छ ।
नेपाली उद्योगहरूले भारतीय बजारमा नेपाली सिमेन्टको माग बढाउन विज्ञापन समेत गर्न थालेका छन् । अहिले अर्घाखाँची, सर्वोत्तम र पाल्पा सिमेन्टले भारतीय बजारमा भित्ते पेन्टिङसमेत गरेको छ । अर्घाखाँची सिमेन्टले भित्ते विज्ञापनबाट भारतीय बजारमा विज्ञापनको शुरुवात गरेको हो ।
सिमेन्ट निर्यातको मासिक तथ्यांक
२०७९ साउन– ४९ लाख रूपैयाँ
भदौ – ४० लाख रूपैयाँ
असोज – एक करोड २६ लाख रूपैयाँ
कात्तिक – एक करोड ३५ लाख रूपैयाँ
मंसिर – ९१ लाख रूपैयाँ
पुस – चार करोड २० लाख रूपैयाँ
माघ – आठ करोड सात लाख रूपैयाँ
फागुन – १३ करोड ७६ लाख रूपैयाँ
चैत – ११ करोड ७६ लाख रूपैयाँ
२०८० वैशाख – १३ करोड १२ लाख रूपैयाँ
जेठ – १२ करोड ३२ लाख रूपैयाँ
असार – १० करोड २९ लाख रूपैयाँ
साउन – २३ करोड ५० लाख रूपैयाँ
भदौ – १८ करोड ३४ लाख रूपैयाँ
असोज – ४३ करोड ४५ लाख रूपैयाँ
कात्तिक – २७ करोड ७६ लाख रूपैयाँ
मंसिर – ३६ करोड १५ लाख रूपैयाँ
पुस – २७ करोड नौ लाख रूपैयाँ
माघ – २९ करोड ७५ लाख रुपैयाँ
फागुन – ४१ करोड ८ लाख रुपैयाँ
चैत्र – ५० करोड २९ लाख रुपैयाँ
