हेटौडाको एभरेष्ट भिनायल प्रालिको नाममा बैंकले प्रवाह गरेको ४८ करोड सहबित्तीयकरण कर्जा खराव कर्जामा परिणत भए पछि बीओके 
ऋण असुली न्यायाधिकरणको शरण परेको छ । बैंकले ४८ करोड ५ लाख ९९ हजार ४ सय ४४ रुपैंया ८२ पैसा एभरेष्ट भिनायलबाट असुल उपर गराईदिन माग गर्दै न्यायाधीकरणमा १०१/०७०/१८९ दर्ता नम्वरमा निवेदन दर्ता गराएको छ ।
बीओकेले संयोजन गरी भिनायललाई सहवित्तीयकरण कर्जा अन्र्तगत हिमालयन बैंक, ग्लोवल आइएमई, नबिल र सनराइज बैंकबाट कर्जा उपलब्ध गराईएको थियो । उद्योग संचालक भई ऋण लिने व्यक्ति विकास कुमार कठोरी दक्षिण कोरिया पुगेर उतै हराएका छन् भने उद्योगको मसिनरी र जग्गासमेत गरी जम्मा २५ करोड मात्र मुल्याङकन भएकाले सबै ऋण असुलीको संभावना न्युन छ । हेटौंडा औधोगिक क्षेत्रमा कित्ता नम्बर ६१६ र २८० मा रहेको जग्गा र त्यहाँ रहेका मसिनरी तत्काल बिक्ने संभावना पनि छैन् । बीओकेसँग न त एभरेष्ट भिनायलको अरु सम्पति धितो छ न त संचालक कठोरीलाई नै समात्नसक्ने अबस्था छ ।
बीओकेको कर्जा असुली बिभागका मिश्रीलाल यादवले भिनायललाई ऋण दिएर समस्यामा परेपछि न्यायाधीकरण गुहारेको स्वीकार गरे पनि विस्तृत बिबरण दिन असमर्थ रहेको बताउनुभयो । यादवले भन्नुभयो– भिनायललाई ऋण दिएको पनि हो, न्यायाधीकरणमा निबेदन पनि दिएको हो, यसबाहेक मलाई केही थाहा छैन् ।
श्रोतका अनुसार ऋण असुली हुने संभावना नरहेकाले ऋण असुली प्रक्रियाको औपचारिकता पुरा गर्न मात्र बीओकेले न्यायाधीकरणमा निबेदन दिएको हो । सहबित्तीयकरणमा सहभागी अन्य बैंकहरुले बीओकेलाई कर्जा असुलीका लागि दबाब दिएपछि बीओके चेपुवामा परेको बताईन्छ ।
ग्लोबल आईएमई र नबिल बैंकका कर्जा असुली बिभागका अधिकारीहरु आफुहरुले बीओकेकै जिम्मेवारीमा भिनायललाई ऋण प्रबाह गरेकाले उठाईदिने जिम्मेवारी पनि उसैको हो भन्छन् । नबिलका रिकभरि विभागका सन्तोष पाण्डेले भन्नुभयो– ऋण असुली न्यायाधीकरणमा मुद्धा हालेका छौं, सबै कुरा बीओकेले संयोजन गरेको छ, उसैलाई थाहा होला ।
कठोरीले एभरेष्ट भिनायलमार्फत कपडा, कृत्रिम छाला र सो सम्बन्धी सामाग्री उत्पादन गर्ने गरी हेटौडा औधोगिक क्षेत्र भित्र उद्योग खोलेको बहाना गरेका थिए । पछि उद्योगको नाममा बैंकहरुलाई ठगेको रहस्य खुलेपछि उनी कुनै पनि औपचारिक सुचना बिना नै उद्योग बन्द गरी बेपत्ता भएका थिए । उद्योग बन्द हुँदा त्यहां दुई सय ५१ मजदुर कार्यरत थिए ।
