सीडीएससीको अध्यक्ष पनि भैसकेपछि अब डिम्याट शेयर कारोबारमा रहेको अन्योल कसरी हटाउनुहुन्छ ?
हामीले पहिलो बैठकबाट नै धितोपत्र बोर्ड, स्टक एक्सचेन्ज र सीडीएससी रहेको त्रिपक्षीय समिति गठन गरिसकेका छौ । यसले ढिलोमा आईतबारदेखि नै काम सुरु गर्नेछ । यो समितिले अहिले हाम्रो सीडीएससीको सिष्टमको लोड परीक्षण गर्नेदेखि कुनै पनि जोखिम र समस्या निराकरण गर्ने काम गर्छ । हाम्रो सिष्टममा सुरक्षित कारोबार गराउन सिष्टम भेण्डर कम्पनी सीएमसी कम्पनी ईण्डियाबाट प्राविधिक ब्यक्तिहरु बोलाएर पनि निराकरण गर्नेछ ।
डिम्याट शेयरमा कर्जा सम्बन्धी अन्योल चाँही कसरी हटाउनुहुन्छ ?
डिम्याट शेयर धितो ऋणको अन्योल हटाउने बारेमा पनि प्राथमिकतासाथ काम गर्छौ । बैंकहरुको रोक्का प्रक्रिया, प्रमाण र बेच्न चाहेको बेला बेच्ने प्रक्रियामा केही रिजरभेसन छ जस्तो लागेको छ । शेयर धितो दिदा यसरी बैंक सुरक्षित हुन्छ भनेर त्यसलाई हामीले सकेसम्म चाडै नै स्पष्ट पार्ने प्रयासमा छौं । बैंकरहरुसँग नै बसेर छलफल गरेर हामी निराकरण गछौ । यो नयाँ प्रणाली त हैन, नयाँ कुरा हामीले गर्न लागेको पनि हैन । विश्वमा नै चलिआएको प्रणाली हो , मात्रै प्रक्रिया के हो र कसरी काम गर्ने हो भन्ने कुरा स्पष्ट गर्ने हो ।
माघ २ गतेदेखि नै बाणिज्य बैंकहरुको पूर्ण अभौतिक कारोबार सुरु होला त ?
हामीले सीडीएससीबाट प्रस्ताव गरेको त्यही हो । धितोपत्र बोर्डले अहिलेसम्म हाम्रो प्रस्ताव स्वीकृत गरिसकेको पनि छैन, अस्वीकृत गरेको पनि छैन् । यसको मतलव काम नगर भनेको पनि हैन । यस विषयमा पनि हामीले पहिलो बैठकबाट गठन गरेको समितिले निर्णय गर्छ । पूर्ण रुपमा अभौतिक कारोबार गर्न तयारीका लागि कति समय लाग्छ, त्यही समितिले भन्छ । मलाई लाग्छ, हामी त्यही समयलाई केन्द्रित गरेर अगाडि बढ्छौ ।
नेप्सेले सीडीएससीको स्वामित्वसँगै नेतृत्व पनि लिईसकेपछि समग्र रुपमा कसरी अगाडि बढ्नुहुन्छ ?
हाम्रो अगाडि अहिले सीडीएसलाई पूर्ण कार्यान्वयन गर्नु नै पहिलो काम हो । हामी पूर्ण रुपमा केन्द्रित हुन्छौ, अरु खास विषयहरु छैनन् । यसमा देखिएका अन्योलहरु हटाउँदै सीडीएस कार्यान्वयनमा केन्द्रित हुन्छौ । अर्थ मन्त्रालय, धितोपत्र बोर्ड, नेप्सेको निर्देशन र निर्णयहरु अनुसार नै अगाडि बढ्ने हो । हाम्रो समग्र ध्यान नै सीडीएसको पूर्ण कार्यान्वयन हो ।
