प्रहरीले सामाजिक भावना विपरित कायम गरेकोले सार्वजनिक अपराध ऐन अनुसार अनुसन्धान प्रक्रिया अगाडि बढाएको बताईएको छ । उनको नक्कली नाममा प्रहरीले जिल्ला प्रशासन कार्यालयबाट म्याद थप गराउनुले घटनालाई झन् रहस्यमय बनाईदिएको छ । देशको प्रतिष्ठित बैंकका प्रमुख कार्यकारीलाई पक्राउ गर्नु, त्यसमाथि झन् नक्कली नाम राखेर जिल्ला प्रशासनबाट म्याद थप गर्नुको कारण नेपाल बैंकर्स संघका अधिकारीहरुलाई पनि थाहा हुन नसकेको बुझिएको छ । नयाँ बानेश्वर प्रहरी बृत्तका एक प्रहरी अधिकारीले उदयकृष्ण उपाध्याय भन्ने ब्यक्तिलाई पक्राउ नै नगरिएको दावी गरे ।
कुमारी बैंकका कम्पनी सचिवले प्रमुख कार्यकारी पक्राउ परेको जानकारीमा आएपछि आफुहरुले प्रहरीमा सम्पर्क गरेको र सामान्य विषयमा पक्राउ गरिएको जानकारी पाएको बताउनुभयो । स्रोतका अनुसार प्रमुख कार्यकारी उपाध्यायले आफु परिबन्दमा परेको र चाडै छुट्ने जानकारी बैंकलाई गराएका छन् । उपाध्याय गत ३ फागुनदेखि बार्षिक १५ दिने बिदामा बसेको कुमारी बैंकले जनाएको छ ।
