नक्कली शेयर प्रमाण पत्रको कारोबार भएको उजुरी परेपछि नेप्सेले चार शेयर दलालको कारोबार गत बिहीबारदेखि रोक्का गरेको थियो । प्रारम्भिक छानविन सकिएकाले ती दुईको कारोबार फुकुवा गरिएको र बाँकी दुई शेयर दलाललाई लगाईएको बन्देज पनि चाडै नै फुकुवा हुने संकेत नेप्सेले दिएको छ ।
शेयर बजारमा नेशनल हाईड्रो, चिलिमे र सानिमा माई जलविद्युतको नक्कली शेयर प्रमाण पत्र बनाई गोविन्द घिमिरे नामका लगानीकर्ताले शेयर दलाल कम्पनीहरुबाट कारोबार गरिएको भेटिएको जनाईएको छ । यसबारे सम्बन्धित शेयर दलाल कम्पनीहरुले नै केही समय अघि नेप्सेमा उजुरी दिएकोमा हाल आएर मात्र छानविन गरिएको छ । प्रहरीले नक्कली शेयर बेचबिखनमा संलग्न केही ब्यक्तिलाई पक्राउ गरिसकेको छ ।
यसैबीच सोमबार पनि शेयर बजार घट्ने क्रम जारी रह्यो । नेप्सेमा साढे ११ अंकले कमी आई ९५९ मा झरेको छ भने कारोबार रकम आईतबारको भन्दा ६ करोडले बढेर १७ करोड १३ लाख रुपैयाँको शेयर किनबेच भएको छ । राजनीतिक अन्योल र शेयर दलालमाथि नेप्सेको छानविनले शेयर बजार प्रभावित देखिएको हो ।
