यी शेयरहरु खरिद बिक्री गर्नेहरुले अनिवार्य रुपमा हितग्राही खाता खोली शेयर खरिद गर्नु अगावै सीडीएससीको प्रणालीसँग आबद्ध हुनुपर्ने भएको छ । त्यसैगरी हाल खाली हस्तान्तरण वा अनुसुचीमा रहेका शेयरहरु १५ दिन भित्रमा बेच्नुपर्ने र नबेचेमा शेयर रजिष्ट्रार मार्फत नामसारी गराई प्रमाणपत्र प्राप्त गर्नुपर्ने वा डिम्याट खातामा जम्मा गर्नुपर्ने भएको छ ।
सीडीएससीले यस अघि गत कार्तिक २ गतेदेखि सबै बाणिज्य बैंकहरुको पूर्ण शेयर अभौतिक कारोबार गर्ने कार्यतालिका सार्वजनिक गरेकोमा त्यो असफल भएको थियो । बाणिज्य बैंकहरुको शेयर खरिदकर्ताले डिम्याटमा मात्र शेयर प्राप्त गर्ने ब्यवस्थालाई कायमै राखी नेप्सेले नयाँ कार्यतालिका सार्वजनिक गरेको हो । सीडीएससीको प्रणालीले दैनिक कारोबारको भार थाम्न नसक्ने अडकलबाजीले पूर्व निर्धारित कार्यतालिका भाँडिएपछि सीडीएससीको सफ्टबेयर बनाउने कम्पनी सीएमसी ईण्डिया लिमिटेडका प्राविधिकहरु झिकाएर नयाँ कार्यतालिका सार्वजनिक गरिएको हो ।
अब सीएमसीकै प्राविधिकहरुको उपस्थितिमा सात वटा कम्पनीहरुको पूर्ण अभौतिक कारोबार परीक्षण हुने भएको छ । यी सातवटा कम्पनीहरुको पूर्ण अभोतिक कारोबारको प्रगति बिबरण हेरेर अर्को साता नेप्सेले थप सातवटा कम्पनीहरुको पूर्ण अभौतिक शेयर कारोबारको कार्यतालिका सार्वजनिक गरी क्रमैसँग सीडीयससीको पं्रणालीलाई पूर्ण रुपमा स्वचालित बनाउने योजना बनाएको छ ।
पहिले सबै बाणिज्य बैंकहरुको एकपटक पूर्ण अभौतिक कारोबार र राफसाफ गर्ने प्रयास गर्दा समस्या आउने संभावना देखिएपछि कार्यतालिकालाई निस्क्रिय पारी सीडीयससी पछाडि हटेको थियो । यसपटक सफटबेयर निर्माण गर्ने भारतीय कम्पनीकै प्राविधिकहरुको रेखदेख र निरीक्षणमा पूर्ण अभौतिक कारोबार र राफसाफ हुने भएकाले भार परीक्षण र समस्या उत्पन्न भए समाधान पनि तत्कालै गरिने नेप्सेले जनाएको छ ।
