हरि गजुरेल 

गत साता साधारण शेयर निष्काशन गरेका दुई लघुत्ति कम्पनीहरुमा सर्वसाधारणले निकै धेरै रकम बराबरको शेयर माग गर्दै आवेदन गरेका छन् ।

गत शुक्रबार शेयर आवेदन बन्द भएको आइएलएफसीओ माइक्रोफाइनान्सको शेयरका लागि ५८ गुणा बढी आवेदन परेको छ भने आइतबार आवेदन बन्द भएको विजय लघुवित्तका लागि ५० गुणा बढी आवेदन परेको अनुमान गरिएको छ ।

शेयर निष्काशनको अन्तिम दिनसम्ममा कूल चार लाख कित्ता माग गरेकोमा दुई करोड ३० लाख ५० हजार कित्ता सेयरका लागि आवेदन परेको छ । बिक्री प्रवन्धक सिभिल क्यापिटलका कमल खत्रीले कुल दुई अर्ब ३० करोड ५५ लाख रुपियाँको आवेदन परेको बताए । 

यस्तै, विजय विकास लघुवित्त संस्थाले बुधबार चार लाख २० हजार कित्ता साधारण शेयर बिक्री खुल्ला गरेकोमा शुक्रबारसम्म ३८ गुणा बढी आवेदन गरेको थियो । उक्त संस्थाको विक्री प्रवन्धक ग्रोमेर क्यापिटलका अनुसार लगानीकर्ताको भीड देख्दा शेयर बिक्रीको अन्तिम दिन आइतबारसम्म ५० गुणाभन्दा बढीले आवेदन परेको आंकलन गरिएको छ 

आइएलएफसीओले निष्काशन गरेको चार लाख कित्ता सेयरमध्ये सामुहिक लगानी कोषका लागि २० हजार र कर्मचारीका लागि आठ हजार कित्ता छाडेर बाँकी शेयरमा सर्वसाधारणले २० देखि एक हजार कित्तासम्म आवेदन गर्न पाउने व्यवस्था गरेको थियो ।

यस लघुवित्तलाई इन्टरनेशनल लिजिङ एण्ड फाइनान्स कम्पनीले प्रवद्र्धन गरेको हो । यसको चुक्ता पुँजी छ करोड रहेकामा १० करोड रुपियाँ पुँजी पु¥याउन सर्वसाधारणलाई शेयर निष्काशन गरेको हो ।
पछिल्लो समयमा लघुवित्त कम्पनीहरुमा लगानीकर्ताको आकर्षण बढिरहेको छ । नेपाल स्टक एक्सचेन्जको कारोबारमा लघुवित्त विकास बैंकहरुको शेयरमूल्य आकाशिएको छभने प्राथमिक शेयर निष्काशनमा पनि लगानीकर्ताको आइरो लाग्ने गरेको छ ।

यसअघि साधारण शेयर निष्काशन भएका जनउत्थान र मिर्मिरे लघुवित्त संस्थामा भन्दा आइएलएफसीओ र विजय लघुवित्त संस्थामा शेयर संख्याको तुलनामा कम आवेदन परेकाले बढी शेयर पर्ने संभावना रहेको छ ।

केही समयअघि जनउत्थान लघुवित्त संस्थाले निष्काशन गरेको ९० हजार कित्ता शेयरको लागि तीनसय ५५ गुणा आवेदन परेको थियो । एकसय रुपियाँ लगानी गर्दा दोस्रो बजारमा कम्तिमा सातसय रुपियाँमा सजिलै बिक्री हुने भएकाले पनि लगानीकर्ता यस्ता लघुवित्त संस्थाको शेयरमा आकर्षित देखिएका हुन ।