साताको अन्तिम दिनको शेयर कारोबारमा एभरेष्ट बैंकको सर्बाधिक धेरै ३७ करोड ८२ लाख रुपैयाँ बराबरका एक लाख १८ हजार कित्ता शेयरहरु किनबेच भएपछि समग्र कारोबार रकम उचालिएर ८२ करोड नाघेको छ । शेयर दलाल नम्बर १३ थ्राइभ ब्रोकरेज हाउस र दलाल नं ५९ दिब्या सेक्युरिटिज एण्ड स्टक हाउसमार्फत एभरेष्टका धेरै कित्ताको शेयरहरु किनबेच भएपछि कारोबार रकम उचालिएको हो ।

दिब्या सेक्युरिटिजका एक कर्मचारीले संस्थागत र ब्यक्तिगत दुबै लगानीकर्ताहरुले एभरेष्ट बैंकका शेयरहरु किनबेच गरेको बताएका छन् । उनले ब्यक्तिगत गोपनियता राख्नुपर्ने भन्दै थप बिबरण भने दिन चाहेनन् । १३ नम्बर दलालले बेचेको शेयर सुरुमा ५९ नम्बर दलालले खरिद गरे पनि पछि ५९ नम्बर आफैले म्याचिङ गरेको देखिएको छ । केही शेयरहरु एभरेष्टका मुख्य प्रबद्र्धकले आफ्ना नातेदारको नामबाट बेचेको बुझिएको छ भने शेयर किन्ने संस्थागत लगानीकर्तातर्फ केही शेयरहरु बिशाल ग्रुप, एलआईसी नेपालले किनेको बुझिएको छ । एभरेष्टले हकप्रद शेयर जारी गर्ने संभावनालाई मध्यनजर गरी संस्थापकका नातेदारले ठूलो परिमाणमा महंगो मूल्यमा शेयर बेची रकम जोहो गरेको हुनसक्ने आँकलन गरिएको छ ।

एभरेष्ट बैंकको शेयर मूल्य धेरै बढेकोले नाफा सुरक्षित गर्ने हिसावले शेयरहरु किनबेच गरिएका हुन् । विगत छ महिनाको दाँजोमा हालैका दिनहरुमा शेयर मूल्य दोब्बर भई प्रति कित्ता तीन हजार चार सयको हाराहारीमा पुगेकाले लगानीकर्ताहरुले राम्रो नाफा कमाएका छन् ।

                                  यसरी माथि गएको छ एभरेष्टको शेयर मूल्य

हाल दुई अर्ब १२ करोड चुक्ता पूँजी रहेको एभरेष्ट बैंकले राष्ट्र बैंकले तोकेको आठ बर्ष पूँजी पुर्याउँन आगामी दुई बर्षभित्र चार गुणा पूँजी थप्नुुपर्ने बाध्यता रहेको छ ।

हाल कम्पनीको जगेडा कोष र खुद नाफा राम्रै भए पनि बोनस शेयरले मात्रै नपुग्ने हुँदा कुनै बैंकलाई किन्नुपर्ने वा हकप्रद जारी गर्नुपर्ने अबस्था छ । अर्कोतर्फ एभरेष्टको बिदेशी साझेदार भारतको पन्जाब नेशनल बैंकले बोनस शेयर भन्दा नगद लाभांशमा जोड गर्ने भएकाले उसको पनि चित्त बुझाउनुपर्ने अबस्था छ । अर्को तर्फ केही बाणिज्य बैंकहरु एभरेष्टमा मिसिने हल्ला चलाईएकाले बिहीबारको शेयर बजारमा ती कम्पनीको शेयर मूल्य प्रभावित भएको छ तर एभरेष्टले कुनै पनि बैंक खरिद गर्ने निधो अहिलेसम्म गरिसकेको छैन । तर बिहीबारको कारोबारमा कुमारी बैंकको शेयर किनबेच बिबेचनायोग्य रह्यो ।

गत साता १२०० अंक पार गरेर हालसम्मकै उच्च अंकमा पुगेका नेप्से यो साता लगात्तार चार दिन घटेपनि अन्तिम दिन विहिबार भने ८ अंकले उक्लिएको छ । विहिबार नेप्से ८.९१ अंकले बढेर ११८३.७६ अंकमा पुगेको छ ।

पूँजी बृद्धिको हल्ला वीमा समूह तर्फ मोडिएको र विकास बैकतर्फ पनि लगानीकर्ताको आकर्षण देखिएको छ । प्रस्तावित बीमा ऐनमा जीवन बिमाको पाँच अर्ब र निर्जिबन बीमाको चार अर्ब चुक्ता पूँजीको प्राबधान राख्न प्रस्ताव भएको छ । यसले बीमा कम्पनीहरुले अनिबार्य रुपमा पूँजी बढाउनुपर्ने भएकाले बोनस र हकप्रद शेयर बढी पाईने हल्लाका कारण लगानीकर्ताहरु बीमातर्फ लागेका देखिएको छ ।
विहिबारको कारोबारमा यति डेभलपमेन्ट बैंकका लगानीकर्ताले सबैभन्दा बढी कमाएका छन् भने इन्फास्टक्चर डेभलपमेन्ट बैंकका लगानीकर्ताले सबैभन्दा बढी गुमाएका छन् ।