सरकारको धेरै स्वामित्व रहेको नेपाल बैंक (NBL) को ५६ औं वार्षिक साधारण सभाले पूँजी वृद्धिका लागि हकप्रद शेयर निष्काशन गर्ने प्रस्ताव पारित गरेको छ । साथै बैंकले सबल हुँदै आफ्नो अहिलेको अवस्था अझै सुधार गर्दै अघि बढ्ने भएको छ । हकप्रद बिक्रीपश्चात बैंकको चुक्ता पूजी ८ अर्ब रुपैयाँको हाराहारीमा पुग्नेछ ।

बैंकको शुक्रबार सम्पन्न साधारण सभाले लगानीकर्तालाई २३ दशमलव ७४३ प्रतिशत हकप्रद शेयर दिने सञ्चालक समितिको निर्णय पारित गरेको हो ।

गत चैत ६ गते बसेको बैंक संचालक समितिको बैठकले यस्तो प्रस्ताव गरेको थियो । त्यसै गरि बैंकको साधारण सभाले अरु बैंक तथा वित्तीयसंस्थासंग मर्जर वा एक्विजिशनमा जान संचालक समितिलाई अख्तियारी समेत प्रदान गरेको छ ।

६ अर्ब ४६ करोड चुक्ता पूँजी रहेको बैंकको हकप्रद बिक्रीपश्चात चुक्ता पूजी ८ अर्ब रुपैयाँको हाराहारीमा पुग्नेछ । चालु आर्थिक वर्षको चैत मसान्तसम्ममा १ अर्ब ६४ करोड रुपैयाँ खुद मुनाफा आर्जन गरेको बैंकले ८२ अर्ब ६३ करोड रुपैयाँ निक्षेप संकलन गरी ५९ अर्ब ८२ करोड रुपैयाँ कर्जा प्रवाह गरेको छ । चैत मसान्तमा बैंकको जगेडाकोष ९४ करोड ९० लाख रुपैयाँले ऋणात्मक रहेको छ । अघिल्लो त्रैमासमा बैंकको जगेडाकोष डेढ अर्ब बढीले नकरात्मक थियो । 

अहिले बैंकमा सरकारको ६२ दशमलव ६३ प्रतिशत र सर्वसाधारणको ३७ दशमलव ७९ प्रतिशत हिस्सा रहेको छ ।

बैंकले आफ्नो पूँजीकोष सुधारका लागि आफ्नो स्वामित्वमा रहेका बिभिन्न चार कम्पनीका शेयर र घरजग्गा बेचेर पुर्ति गर्ने प्रयास गरिरहेको छ । यस क्रममा केही संस्थाका शेयर बिक्रि भैसकेका छन् भने केहीका बिक्रि हुने प्रकृयामा रहेका छन् ।

....................................................................................................................................................................