गत बर्षको पहिलो त्रैमाससम्ममा २३ करोड रुपैयाँ जगेडा कोष घाटामा रहेको नेपाल ग्रामिण बिकास बैंक यस बर्षको पहिलो त्रैमासमा आईपुग्दा चाढे चार करोड रुपैयाँ जगेडा नाफामा गएको उसको बित्तीय बिबरणमा उल्लेख छ ।
कम्पनीले चालु आर्थिक बर्षको पहिलो त्रैमासमा तीन करोड रुपैयाँ खुद नाफा कमाएको छ भने निस्क्रिय कर्जालाई पाँच प्रतिशतको हाराहारीमाा सिमित गरेको छ । बैंकको खुद ब्याज आम्दानी बढे पनि कर्मचारी र संचालन खर्च अत्यधिक रहेकाले कमाएको धेरै रकम त्यसै वापत भुक्तानी गरेका देखिन्छ ।
नेपाल ग्रामिण बिकास बैंकको सुरु देखिकै अबस्थाबारे जानकार स्रोतले भने बैंकको बित्तीय अबस्थाको पूर्ण रुपमा परीक्षण गरिए आशातित प्रगति भएको नदेखिने दावी गरेका छन् । पूर्ण कम्प्युटकृत प्रणाली नभएकाले उसको सम्मूर्ण बित्तीय अबस्था झल्किन सकेको छैन । बैंकको पूँजी कोष अनुपात राष्ट्र बैंकले तोके भन्दा निकै कम रहेकाले अरु धेरै सुधारको आबश्यकता खट्किएको छ ।
हालै साधारणसभा सम्पन्न भई अनुभवी नयाँ कार्यकारी प्रमुखले जिम्मेवारी सम्हालेको हुँदा बैंकले आगामी दिनमा राम्रै प्रगति गर्नसक्छ तर यही बहानामा उसको सेयर उचालिएर किन्नु चाँही फाईदाजनक नहुनसक्छ । बिगतमा मर्ज हुँदा कतिपय बैंकका सेयरधनीले १०० कित्ता बराबर एक कित्ता पनि स्वाप नपाएका र बैंकले गत बर्षको खुद नाफाबाट कत्तिपनि लाभांश बाड्न नसक्ने अबस्था छ ।
