तिब्र उतार चढाबका बीच विहीबारको बजार अन्तत हरियो भएर बन्द भयो । बजार खुल्ना साथ बढेको बजार केही समयपश्चात ओरालो लागेको थियो। एक घण्टाको कारोबार अवधिपछि पुन उकालो लागेको बजार ३.३५ अंकले बढेर १४७९.८६ अंकमा पुगेको छ । अघिल्लो दिनको तुलनामा कारोबार रकम भने चार करोडले घटेको छ ।
यसदिन सेयरबजारमा १२० कम्पनीको ३२ करोड २७ लाख रुपैयाँ बराबरको सेयरकिनबेच भयो । सिभिल बैंकको एक करोड ४६ लाख बराबरको संस्थापक सेयरको किनबेचले कारोबार रकममालाई केही टेवा पुर्याएको छ । विहीबारको कारोबारमा होटल र अन्य बाहेक सबै समूह सकरात्मक रहेका छन् ।
यसदिन सबैभन्दा धेरै कारोबार गर्ने सिद्धार्थ इन्भेष्टमेन्ट ग्रोथ स्किम एकको ४ करोड ९४ लाख बराबरको सेयर किनबेच भयो । ३८ प्रतिशत बोनस प्रस्ताव गरेपछि लक्ष्मी बैंकको सेयरमूल्य बढेर ३ करोड ७७ लाख बराबरको सेयर किनबेच भयो । लक्ष्मी बैंकको ५० हजार कित्ता सेयर किनबेच भएको छ । सिद्धार्थ बैंक र नेपाल लाइफले पनि डेढ करोड बढिको कारोबार गरे ।
यसदिन खानिखोला हाइड्रोका लगानीकर्ताले सबैभन्दा धेरै कमाए । यो कम्पनीको सेयरमूल्य सबैभन्दा धेरै दश प्रतिशतका दरले बढेको छ । ग्रिन डेभलपमेन्ट बैंक र लक्ष्मी बैंकको सेयरमूल्य पनि आठ प्रतिशत बढिले उकालो लागेको छ । ललितपुर फाइनान्स र अरुण फाइनान्स लगायतका कम्पनी पनि धेरै कमाउनेमा परे ।
यता लगात्तार तीनदेखि झण्डै दश प्रतिशतको हाराहारीमा बढेको कर्णाली डेभलपमेन्ट बैंकको सेयरमूल्य भने विहीबार दश प्रतिशतकै हाराहारीमा घटेको छ । मञ्जुश्री फाइनान्स,एनबि इन्स्योरेन्स लगायतका कम्पनी धेरै गुमाउनेमा परे।