कम्पनीले आयोजना प्रभावितका लागि दुई लाख ६० हजार कित्ता सेयर निष्काशन गरेको थियो । उक्त सेयरका लागि चार हजार दुई सय १३ जनाले आवेदन गरी आठ लाख ६२ हजार एक सय ८० कित्ता सेयर माग गरेका थिए । सबै आवेदकलाई तीस दशमलव १६ प्रतिशतका दरले सेयर बाँडफाँड गरिएको क्यापिटलले जनाएको छ । ५० कित्ताका आवेदकले १५ कित्ता सेयर पाएका छन् भने एक हजार कित्ताका आवेदकले दुई सय ९५ कित्ता सेयर पाएका छन् ।
साना लगानीकर्ताले ६० दशमलव ८४ प्रतिशत सेयरका लागि आवेदन गर्दा ठुलाले ३९ दशमलव १६ प्रतिशत मात्र सेयर माग गरेका कारण सबै आवेदकलाई ३०.१६ प्रतिशतको दरले सेयर बाँडफाँड गरिएको बताइएको छ । सेयरका लागि तीन दशमलव ३२ गुणा बढी आवेदन परेको थियो ।
कम्पनीले दोलखाको भिमेश्वर ८,९ र ११, मागपौवा ५ र काटाकुटी ६ का बासिन्दाका लागि उक्त शेयर निष्काशन गरिएको थियो । ३.५ मेगावाट क्षमताको चर्नावती खोला जलविद्युत आयोजना निर्माण सम्पन्न गरी नियमित रुपमा विद्युत बिक्री गर्दै आएको कम्पनीको चुक्ता पूँजी १९ करोड ५० लाख रुपैंया रहेको छ ।
कम्पनीले सोही पूँजीको १५ प्रतिशत अर्थात ३ लाख ९० हजार कित्ता शेयर सर्वसाधारणका लागि निष्काशन गर्दैछ । त्यस पछि कम्पनीको चुक्ता पूँजी २६ करोड रुपैंया पुग्नेछ ।
कम्पनीलाई इक्रा नेपालले कम्पनीको सेयर निश्काशनलाई रेटिंग चार प्रदान गरेको छ । यसको अर्थ कम्पनीको वित्तीय अवस्थामा सामान्य मात्र रहेको बुझिन्छ । नेपाल उद्योग वाणिज्य महासंघ उर्जा समितिको सभापति ज्ञानेन्द्रलाल प्रधान हाइड्रो पावरको अध्यक्ष छन् भने महासंघका अध्यक्ष पशुपति मुरारका लगायत सञ्चालक रहेका छन् ।
