साधारणसभामा बोल्ने सेयरधनीले उठाएको प्रश्नबारे मेरोलगानीसँग कुरा गर्दै बैंक सञ्चालक समिति अध्यक्ष जनार्दन शर्मा आचार्यले ५१ प्रतिशत सेयर सरकारले बेचेर रणनीतिक साझेदार भित्र्याउन प्रस्ताव गरिएको बताए । बैंक सञ्चालक समितिले यसबारे प्रस्ताव गरेको र अर्थ मन्त्रालयले निर्णय गर्न बाँकी रहेको उनको भनाई छ ।
सरकारले बिनिबेश प्रक्रियाबाट २०७४ असार भित्रमा नेपाल बैंकबाट बाहिरिने स्पष्ट पारिसकेको छ । केही समय अघि अर्थमन्त्री कृष्णबहादुर महराले अर्थ मन्त्रालयमा यसम्बन्धी घोषणा गर्दै २०७४ असार मसान्तसम्म नेपाल बैंकमा रहेको सेयर बिक्री गरिसक्ने घोषणा गरेका थिए ।
नेपाल बैंकमा ६२ प्रतिशत सेयर सरकारको स्वामित्वमा रहेको छ । नेपाल बैंकमा लगानी गर्न भारत, चीन र देशभित्रैका ब्यापारिक तथा ब्यवसायिक घरानाहरुले चासो दिएको बुझिएको छ । साधारणसभाले २०७५ साल असार मसान्तमा देशको प्रमुख बाणिज्य बैंकमा स्थापित भई सेयरधनीलाई १५ प्रतिशतको हाराहारीमा लाभांश दिने प्रतिबद्धता ब्यक्त गरेको छ ।
केही बर्ष अघि खराब कर्जाको भारीले बिघटनको डिलमा पुगेर फर्किएको नेपाल बैंक हालैका दिनहरुमा चमत्कारिक प्रगति गर्दै आएको छ । उसले चालु आर्थिक बर्षको दोस्रो त्रैमास सम्ममा एक अर्ब ८९ करोड भन्दा बढी खुद नाफा गरेको छ भने निस्क्रिय कर्जा न्युन गर्दै पूँजी कोष बढाउँदै लगेको छ ।
साधारणसभामा सेयरधनी अमृतनाथ रेग्मीले बैंकलाई त्रिशुली मात्र नभई नारायणी बन्न सुझाए । बैंकको खर्च बढि रहेको, कार्यक्षमता निजी बैंकसँग प्रतिस्पर्धामा अगाडि बढुनपर्ने अवस्था रहेकोले पूँजी वृद्धिसँगै आधुनिक अबधारणा र दृष्किोण सहित अगाडि बढ्न सुझाव दिए ।
