कम्पनी संचालक समितिको बैठकले गरेको २० प्रतिशत बोनस प्रस्ताव बीमा समितिको स्वीकृति र कम्पनीको आगामी साधारणसभाबाट पारित भएपछि लगानीकर्तालाई वितरण गरिनेछ ।
हाल कम्पनीको चुक्तापूँजी दश करोड १२ लाख रुपैयाँ रहेको छ । २० प्रतिशत बोनसपछि कम्पनीको पूँजी १२ करोड १४ लाख रुपैयाँ पुग्नेछ । कम्पनीको यसअघिको विशेष साधारणसभाले डेढ सय प्रतिशत हकप्रद जारी गर्ने प्रस्ताव पारित गरिसकेको छ ।
कम्पनीले हाल कायम एक शेयर बराबर साढे एक शेयरको आधारमा हकप्रद जारी गरेपछि चुक्ता पूँजी पच्चीस करोड पुग्ने छ । बोनस समेत जोड्दा कम्पनीको पूँजी २७ करोड रुपैयाँ नाघ्ने छ ।
बीमा समितिको पछिल्लो निर्देशन अनुसार निर्जीवन बीमा कम्पनीहरुले ०७५ असारसम्ममा एक अर्ब चुक्तापूँजी पुर्याउनुपर्ने हुन्छ । एभरेष्ट इन्स्योरेन्स हाल संचालनमा रहेका बीमा कम्पनीमध्ये चुक्तापूँजीको आधारमा सबैभन्दा कमजोर कम्पनी हो ।
एभरेष्ट ईन्स्योरेन्सका सबै शेयरहरु साधारण शेयरमा रुपान्तरण भईसकेका छन् ।
कम्पनीले अग्नि बिमाको दावी भुक्तानीमा गडबडी गरेपछि बीमा समितिको कारबाहीमा परेको थियो । संस्थागत अबस्थामा सुधार आएमा बीमा समितिले गरेको कारबाही फुकुवा भई नियमित संचालनमा आएर एभरेष्टले कारोबारलाई पनि ब्यापक रुपमा बृद्धि गर्नुपर्ने अबस्था छ ।
