आईएमई डिजिटलले “आईएमई पे” ब्रान्ड अन्तर्गत मोबाइल वालेट सेवा उपलब्ध गराउने विज्ञप्तीमा उल्लेख छ । यो प्रणालीबाट सेवाग्राही आफैले अथवा एजेन्टहरूको सहयोग लिएर मोबाइल मार्फत् विभिन्न किसिमका भुक्तानी गर्न सक्ने कम्पनीले जनाएको छ ।
आईएमई डिजिटलको चाँडै नै आईएमई पे सेवालाई सञ्चालनमा ल्याउने योजना रहेको बताइएको छ । सो प्रणालीबाट सेवाग्राहीलाई दर्ता गर्ने, मोबाइल मार्फत् तत्कालै पैसा पठाउने र प्राप्त गर्ने, बिलहरूको भुक्तानी गर्ने, रकम ट्रान्सफर गर्ने, विद्यालय र कलेजका शुल्कहरू भुक्तानी गर्ने देखि अनलाइनभन्दा बाहिर रहेका रेस्टुरेन्ट, ग्रोसरी र डिपार्टमेन्ट स्टोरहरूका साथै साना ठूला खुद्रा पसलहरूमा अफलाइन नै भुक्तानी गर्न सकिने बताइएको छ ।
आईएमई समूहका अध्यक्ष चन्द्र प्रसाद ढकालले आईएमईको व्यापक सञ्जाल अन्तर्गत रहेका विद्यमान ६ हजार भन्दा बढी रेमिटेन्स एजेन्टहरू, आईएमई समूह अन्तर्गतका २ हजार भन्दा बढी बिक्री केन्द्रहरू का साथै सञ्जाल बाहिर रहेका हजारौँ आउटलेटहरू मार्फत सेवा उपलब्ध गराउने बताए ।
आईएमई डिजिटलले अन्तर्राष्ट्रिय स्तरको आर्किटेक्चर प्रणालीमा आधारित गुणस्तरीय वालेट प्लेटफर्म विकास गरिसकेको छ । यसमा देशव्यापी मोबाइल मनी अपरेसनका लागि आवश्यक सहजताका साथै अत्यन्त सुरक्षित रूपमा कारोबार गर्न सकिने व्यवस्था गरिएको छ ।