बैंकले गत आर्थिक बर्षमा चुक्तापूँजी ३ अर्ब ८ करोड बाट बढाएर ५ अर्ब १८ करोड पुर्याएको छ भने जगेडाकोष समेत ५३ करोडबाट एक अर्ब ४९ करोड पुगेको छ ।
यसबीचमा बैंकले इन्टरनेशनल लिजिङ एण्ड फाइनान्स, युनियन फाइनान्स र हामा मर्चेण्ट एण्ड फाइनान्सलाई प्राप्ति गरेको थियो । पूँजी बढेको अनुपातमा बैंकको कमाई भने खुम्चिएको छ ।
गतबर्ष बैंकले ३३ करोड ८१ लाख रुपैयाँ खुद नाफा गरेको छ । जून अघिल्लो आर्थिक बर्षको तुलनामा ६७ लाख मात्र बढी हो । अघिल्लो बषै बैंकले ३३ करोड १४ लाख खुद मुनाफा गरेको थियो ।
विभिन्न संस्थालाई आफूमा मिलाउँदा बैंकको जगेडा कोषमा भने झण्डै ५५ करोड रुपैंयाको योगदान पुगेको छ । जसका कारण बैंकले प्रकृयामा रहेको हकप्रद पश्चात पनि बोनसबाट चुक्ता पूँजी आठ अर्ब नघाउन सक्ने देखिन्छ ।
बैंकले ठूलो मात्रामा खराब कर्जा उठाएपनि संचालन नाफा भारी मात्रामा घटेपछि नाफा बढाउन सकेन । यसअवधिमा बैंकले ४३ करोड ७२ लाख खराब कर्जा उठाएको छ । ठूलो मात्रामा खराब कर्जा उठाएपनि अझै ४.०५ प्रतिशत खराब कर्जा देखिन्छ । अघिल्लो बर्ष खराबकर्जा २.७० प्रतिशत थियो । संचालन नाफा २७ करोडबाट ११ करोडमा झरेको छ ।
यसअवधिमा बैंकले ३४ अर्ब निक्षेप संकलन गरेर २९ अर्ब कर्जा परिचालन गरेको छ । बैंकको प्रति शेयर आम्दानी ६.५२ रुपैयाँ, मूल्य आम्दानी अनुपात ३७.७३ प्रतिशत, तरलता अनुपात २९.६५ प्रतिशत र प्रति शेयर नेटवर्थ १२८.८० रुपैयाँ रहेको छ ।
बैंकले आठ अर्ब चुक्तापूँजी पुर्याउन ४० प्रतिशत हकप्रद बिक्रीको प्रक्रियामा रहेको छ ।