आइतबार चिलिमेको कारोबार प्रतिकित्ता ८९२ रुपैयाँमा खुलेको थियो । कारोबार खुलेको केहीबेरमै समग्र बजार ओरालो लाग्दै जादा चिलिमेको सेयरमूल्य पनि प्रतिकित्ता ८८० रुपैयाँसम्म झरको थियो । तर बजार बन्द हुने समयसम्म आइपुग्दा नेप्सेमा झण्डै दोहोरो अंकको गिरावट आएपनि चिलिमेको सेयरमूल्य भने सबैभन्दा बढी करिब ७ प्रतिशतले बढेर प्रतिकित्ता ९५४ रुपैयाँ पुगेको छ ।
आइतबारको बजारमा मात्रै चिलिमेको सेयरमूल्य ६.९५ प्रतिशत अर्थात प्रतिकित्ता ६२ रुपैयाँले बढेको छ । कम्पनीकाे बजार बन्द हुनै लाग्दा अन्तिम कारोबारमै प्रतिकित्ता १८ रुपैयाँ बढाएर ४४ कित्ता सेयर किनबेच भएको देखिन्छ । जसको सेयर ब्रोकर नं ३ ले २९ कित्ता तथा ४३ ले १५ कित्ता बिक्री गरेको छ भने दुवै सेयर ब्रोकर नं ३६ ले किनेको देखिन्छ । एकाएक मूल्य बढाएर अन्तिम कारोबार हुँदा आइतबारको बजारमा केही चलखेल गरेको देखिन्छ ।
आखिर किन बढाइयो शेयरमूल्य
हुनत: आइतबारको बजारमा समग्र हाइड्रोपावर कम्पनीको सूचक नै ५५ अंकले बढेको छ । सरसर्ती हेर्दा चिलिमेको मूल्य स्वभाविक रुपमा बढेको देखिन्छ । तर सेयरबजारमा खेलाडीहरुले भने चिलिमेको सेयरमूल्य सामान्य रुपमा बढेको भन्दा पनि बढाइएको बताएका छन् ।
सेयरबजारमा सूचीकृत हाइड्रो पावर कम्पनीहरुमध्ये चिलिमे लगानीकर्ताको पहिलो रोजाईमा पर्ने कम्पनी हो। यो कम्पनीमा ठुला संस्थागत लगानीकर्ता, म्युचुअल फण्डदेखि बैंक तथा वित्तीय संस्थाहरुले धेरै संख्यामा सेयर लिएका छन् ।
विशेष गरी बैंक तथा वित्तीय संस्थाहरुले यसको सेयर धेरै लिएका छन् । दोस्रो त्रैमासको अन्तिम दिन चिलिमेको सेयरमूल्य बढाउँदा बैंकहरुले दोस्रो त्रैमासको वित्तीय विवरण प्रकाशित गर्दा जोखिम व्यवस्था बापतको रकम कम गर्दा हुने भएपछि चिलिमेको सेयरमूल्य बढाएको एक लगानीकर्ताको विश्लेषण छ । जसले गर्दा चिलिमेको सेयर लिएका बैंकहरुलाई आफ्नो नाफा केही भएपनि बढाउन सहयोग पुग्छ ।
अर्काेतर्फ बैंकहरुले धमाधम मार्जिन कल गरिरहेका बेला चिलिमेको सेयरमूल्य बढाएर लगानीकर्ता र ब्रोकरहरुले चलाखी गरेको पनि अर्काथरीको भनाई छ । सेयरमूल्य उच्च बनाउँदा मार्जिन कर्जामा सहजता हुनेछ ।
केही विलेश्षकहरुले भने चिलिमेको सहायक कम्पनीहरुमा रसुवागढी हाइड्रोपावरमध्ये भोटेकोशी जलविद्युतको निमार्ण दुई बर्षभित्र पुरा गर्न प्राधिकरणका कार्यकारी निर्देशक कुलमान घिसिङले दिएको निर्देशन र आयोजनाको निमार्ण कार्यले गति लिएको खबरले पनि चिलिमेको सेयरमूल्य बढाउन टेवा पुगेको आँकलन गर्नेहरु पनि छन् । मध्येभोटेकोशीको निमार्ण कार्य ४० प्रतिशत सम्पन्न भईसकेको छ ।
त्यस्तै,सान्जेन जलविद्युत कम्पनीले आइपीओ निष्कासनको तयारी गरेकाले पनि कम्पनीको सेयरमूल्य बढ्न सहयोग पुगेको समेत विश्लेषण गरिएको छ । सान्जेनले संस्थापक सेयरधनी संस्थाका कर्मचारी, कर्मचारी सञ्चय कोषमा रकम जम्मा गरेका संचयकर्ता कर्मचारी र ऋण दाता संस्थाका कर्मचारीलाई साढे ८७ करोड बराबरको आइपीओ निष्कासन गर्देछ ।
यसमा नेपाल विद्युत प्राधिकरणको ५१ प्रतिशत र सर्वसाधारणको ४९ प्रतिशत हिस्सा रहेको छ । जसमध्ये १० प्रतिशत स्वामित्व स्थानियको रहेको छ ।
