नेप्सेका अनुसार साउन ६ गतेसम्म ५० वटै दलाल व्यवसायीहरु प्रणाली (ट्रेड म्यानेजमेन्ट सिस्टम) सँग आबद्ध भईसकेका छन् । नेप्सेले सबै शेयर ब्रोकर अनलाईन प्रणालीमा आवद्ध भएकाले लगानीकर्तालाई यूजर नेम र पासवर्ड वितरण गर्न निर्देशन दिएको जनाएको छ ।
लगानीकर्ताले आफूले सेयर कारोबार गरिरहेको ब्रोकर कार्यालय मार्फत यूजर नेम र पासवर्ड लिन सक्नेछन् । तर यो भन्दा अगाडि आफ्नो ग्राहक परिचय विवरण (केवाईसी फारम) अध्यावधिक गर्नुपर्ने हुन्छ । केवाईसी अध्यावधिक गराउँदा खासगरी इमेल आईडी र मोबाइल नम्बर अनिवार्य चाहिने छ ।
लगानीकर्ताले ब्रोकर मार्फत यस्तो यूजर नेम र पासवर्ड लिएसँगै आफ्नो कारोबार तथा म्याचिङ्ग हेर्न सक्नेछन्। तर आफ्नो अर्डर आफैँले दिन भने युजर एसेप्टेन्स टेष्ट (युएटी) पछि मात्रै पाउने नेप्सेले जनाएको छ ।
हाललाई परीक्षण कारोबार भएकाले लगानीकर्ताले यूजर नेम र पासवर्ड पाएपनि अर्डर दिन पाउने छैनन् तर ब्रोकरले लिएको अर्डरको कार्यान्वयन कसरी भईरहेको छ भन्ने बिषयमा अनलार्इन मार्फत नै जानकारी प्राप्त गर्न भने सक्नेछन् ।
त्यस्तै अनलार्इन प्रयोगकर्ताले ब्रोकरले दिएको आदेश र आफ्नो आदेश प्रणालीमा म्याचिङ्ग भए नभएको हेर्न सक्ने पनि नेप्सेले जनाएको छ ।
अनलार्इन कारोबार प्रणालीमा समावेश सबै प्रणालीको चेकजाँचका लागि हाललाई परीक्षण कारोबार मात्र थालिएको हो । परीक्षणको क्रममा आएका सल्लाह सुझाव अनुसार यो प्रणालीमा सुधार समेत गरिदै लगिनेछ ।
यो अवधिमा सरोकारवालाहरुले दिएको सुझावलाई समेटेर आवश्यकता अनुसार परिमार्जन तथा विकास गर्न सकिने नेप्सेको भनाई छ । परीक्षण कारोबार सफल भएपछि मात्र पूर्ण रुपमा अनलाइन कारोबार प्रणाली कार्यान्वयनमा आउनेछ ।
नेप्सेले साउन १ गतेबाट अनलाइन कारोबार प्रणालीको परीक्षण सुरुवात गरेको थियो ।