मंगलबार मात्रै एक वाणिज्य बैंक सहित १७ विकास बैंक र केही फाइनान्स कम्पनीहरुले गत बर्षको वित्तीय विवरण सार्वजनिक गरेका छन् ।
एनआईसी एशिया बैंकले डेढ अर्ब बढीको खुद नाफा गरेको विवरण सार्वजनिक गरेको छ ।
१७ विकास बैंक मध्ये चार बाहेक अन्य सबै विकास बैंकको नाफा बढेको छ । फाइनान्स कम्पनीहरुको वित्तीय विवरण पनि मिश्रित प्रकारको आएको छ ।
हालसम्म वित्तीय विवरण सार्वजनिक गरेका अधिकांश कम्पनीहरुले प्रगति उन्मुख वित्तीय विवरण प्रस्तुत गरेका छन् । तर शेयर बजारका लगानीकर्ता कम्पनीहरुको वित्तीय विवरणमा खासै आर्कषित देखिएनन् । अधिकांश बैंक तथा वित्तीय संस्थाहरुले राष्ट्र बैंकले तोकेको न्यूनतम चुक्ता पूँजी कायम गरेको अवस्थामा आगामी दिनमा कम्पनीहरुले कसरी लाभांश वितरण गर्लान भन्ने अन्याैलता पनि लगानीकर्तामा देखिएको छ ।
वित्तीय क्षेत्रमा तरलताको अवस्था सहज हुँदै गएपनि बैंक ब्याजदर घट्न सकेको छैन । दिनप्रतिदिन शेयर बजारमा विगतमा कम्पनीहरुले प्रदान गरेका बोनस र हकप्रद शेयर थपिने क्रम जारी छ भने उतिनै मात्रामा प्राथमिक निष्काशनहरु पनि भईरहेका छन् । हकप्रद र लिलामी पनि खुलिनै रहेका छन् । दोस्रो बजारमा सोझै हुने लगानी अन्यत्र क्षेत्रमा तानेको अवस्थामा कारोबारमा चमक आउन सकेको छैन । जसले गर्दा शेयरबजार समेत अस्थिर देखिएको छ ।
मंगलबार नेप्से परिसूचक २.९१ अंकले घटेर ११९१.४७ बिन्दुमा झरेको छ । दिनभर बजारमा १६३ कम्पनीको १६ करोड ७७ लाख बराबरको शेयर किनबेच भयो । अघिल्लो दिनको तुलनामा कारोबार रकम १३ करोड कम हो ।
यसदिन कारोबारमा आएका दश उप-समूहमध्ये तीनको बाहेक सबैको सूचक घटेको छ । विकास बैंक, जलविद्युत र वित्त समूहको सकारात्मक रहँदा अन्य सबै समूहको सूचक नकारात्मक रहेको छ ।
मंगलबारको बजारमा सबैभन्दा धेरै कारोबार हुने एनएमबि बैंकको ७८ लाख बराबरको मात्र शेयर किनबेच भयो । इन्भेष्टमेन्ट बैंकको ७१ लाख बराबरको कारोबार भयो ।
यसदिन सिद्धार्थ ओरेन्टेड इक्वीटी स्किमको इकाई मूल्य सबैभन्दा धेरै चार प्रतिशतले बढेको छ । सहयोगी विकास बैंक, सृजना फाइनान्स, लुम्बिनी विकास बैंक तथा पोखरा फाइनान्स लगायतको शेयरमूल्य सामान्य बढेको छ ।
सिटी एक्सप्रेस फाइनान्सका लगानीकर्ताले सबैभन्दा धेरै झण्डै दश प्रतिशतले गुमाएको बजारमा निर्धन उत्थान लघुवित्त, सूर्या लाइफ, एनएलजि इन्स्योरेन्स तथा किसान माइक्रो लगायतको शेयरमूल्य धेरै घटेको छ ।
