एनएमबि बैंकले साउन २६ गते अाइतबारदेखि आधार ब्याजदरमा २ प्रतिशत देखि अधिकतम ६ प्रतिशतसम्म प्रिमियममा कर्जा प्रवाह गर्ने भएको छ । यसअघि बैंकले न्यूनतम तीन प्रतिशतदेखि ६ प्रतिशत प्रिमियममा कर्जा प्रवाह गर्दै आइरहेको थियो । असार मसान्तसम्म बैंकको आधार ब्याजदर १०.७० प्रतिशत र स्प्रेडदर ४.१४ प्रतिशत रहेको छ ।
बैंकले आधार ब्याजदरमा न्यूनतम दुई देखि अधिकतम १० प्रतिशत प्रिमियममा सेयर कर्जा उपलब्ध गराउने भएको छ । प्राइममा २ देखि ५, स्टाण्डर्डमा २ देखि ७ र अन्यमा ७ देखि १० प्रतिशत प्रिमियमा सेयर कर्जा प्रवाह गरिने बैंकले उल्लेख गरेको छ ।
बैंकले मुद्धती निक्षेपको ब्याजदर त्रैमासिक रुपमा भुक्तानी गर्ने गरि ७ प्रतिशतसम्म झारेको छ भने व्यक्तिगत तर्फ एक बर्षको मान्यजन मुद्धतीमा अधिकतम १०.५० प्रतिशतसम्म ब्याजदर निर्धारण गरेको छ । बजारमा लगानी गर्ने पैसा नभएपछि बैंकहरूमा निक्षेप तानातान भएपछि बैंकले गत चैतमा २ हप्ते मुद्धती निक्षेप १० प्रतिशतमा उठाएको थियो ।
साधारण बचतका २२ मध्ये १८ शिर्षकमा बैंकले ५ प्रतिशत मात्र ब्यादरमा निक्षेप संकलन गर्ने भएको छ । एनएमबि तलब खाता र उमङ्ग खातामा बैंकले अधिकतम ७ प्रतिशत ब्याजदर प्रदान गर्ने र नारी सम्मान बचतमा ६ प्रतिशत तथा एनएमबि सरल बचत र डिलाइट सेभिङ्गमा साढे पाँच प्रतिशत ब्याजदर प्रदान गर्नेछ ।
बैंक ब्याजदर र सेयर बजारमा विपरित सम्बन्ध रहन्छ । ब्याजदर उच्च हुँदा सेयर बजारले गति लिन सकिरहेको हुँदैन भने ब्याजदर घटन थालेपछि सेयर बजारले सुधारको लय समात्छ । यसरी बैंक ब्याजदर विस्तारै घट्न जाने हो भने त्यसको सकरात्मक प्रभाव शेयरको दोस्रो बजार सूचकमा पर्ने आंकलन गर्न सकिन्छ ।
