एनएमबी क्यापिटलका प्रमुख कार्यकारी श्रीजेश घिमिरेले १ अर्ब ९५ करोड भन्दा बढी रकमको आबेदन परेको पुष्टि गर्दै अब ७५ करोड रुपैयाँको ईक्विटी बांडफाड गरिने जानकारी दिनुभयो । उहांले ७ हजार आबेदकले ईक्विटी माग गरेको जानकारी दिदै ४ कार्य दिनमा अपार उत्साहका साथ सहभागिता जनाउने सबैप्रति आभार ब्यक्त गर्नुभयो । उहांले यही असोज मसान्त भित्रै ईक्विटीको बांडफांड सकेर लगानीकर्ताहरु समक्ष गरिएको प्रतिबद्धता अनुसार कार्य गर्ने दृढता पनि ब्यक्त गर्नुभयो ।
एनएमबी क्यापिटलले लगानीकर्तालाई पहिलो बर्षमै कम्तिमा १० प्रतिशत प्रतिफल दिने लक्ष्य लिएको छ । ईक्विटीको बिक्रीबाट जम्मा हुने ७५ करोड रुपैयाँ मध्ये ८० प्रतिशतसम्म रकम धितोपत्रको दोस्रो बजारमा लगानी गर्ने उस्को योजना छ ।
नेपालमा संचालनमा रहेका सामुहिक लगानी कोष मध्ये यो तेस्रो सामुहिक लगानी कोष हो । यसअघि सिद्धार्थ क्यापिटलले दुई पटक र नबिल ईन्भेष्टमेन्टले एक पटक यस्ता सामुहिक लगानी कोषहरुको निश्काशन गरिसकेका छन् । यस्ता सामुहिक लगानी कोषको आगमनले नेपाली पूँजी बजारलाई टेवा पुग्ने विस्वास गरिएको छ ।
