जुन प्रस्ताव थियो,चलिरहेको सवारी लाइसेन्स प्रयोगात्मक परिक्षालाई परिमार्जन गर्दै अंक प्रणालीमा आधारीत ट्रायल प्रणाली । नयाँ प्रणालीको ढाँचा र प्रस्ताव बाहिर आएपछि बषौंदेखि ट्रायल परिक्षा कटाउन नसकेका मात्रै होइनन नयाँ लाइसेन्स आवेदक र आवेदन दिन तयारी रहेका सेवाग्राहीसमेत खुसी भए ।
अहिले भइरहेको लाइसेन्स प्रक्रियाको अन्त्य हुने भएपछि उत्साह त हुने नै भयो । यातायात व्यवस्था विभागका युवा नेतृत्व अर्थात महानिर्देशक गोगन हमालको सक्रियतामा लाइसेन्स ट्रायल परिक्षाको ढाँचा परिवर्तन गरी नयाँ व्यवस्था लागू गर्ने गरी प्रक्रिया अघि बढाइयाे ।
सवारी अनुमति पत्र लाइसेन्स ट्रायलको नयाँ प्रणालीबारेकाे प्रकृया भौतिक पूर्वाधार तथा यातायात मन्त्रालयमा गएर रोकिएको छ । यातायात विभागले एक महिना अघि ढाँचा तयार गरी मन्त्रालयमा पठाएको थियो तर यस बिषयमा थप प्रगति भएकाे छैन ।
यातायात व्यवस्था विभागका महानिर्देशक गोगन हमालले प्रयोगात्मक परिक्षाको नयाँ प्रणालीको प्रस्ताव पठाएको १५ दिन भएको भने पनि मन्त्रालयमा सो प्रस्ताव गएको झन्डै डेढ महिना वित्न लागिसकेको छ । महानिर्देशक हमालले नयाँ प्रणालीको बिषयमा मन्त्रालयमा छलफल भइरहेको बताएका छन्।
‘विभागबाट प्रस्ताव गएको लगभग १५÷२० दिन भयो होला’ उनले भने ‘देशको राजनीतिक हलचलको कारण उक्त प्रस्ताव स्वीकृत हुन नसकेको हुनसक्छ’ । हमाल थप्छन ‘हामी सेवाग्राहीले भोगेको समस्या र झन्झटिला प्रक्रियालाई प्रतिस्थापन गर्दै गएका छौं । ढिलो चाँडो भन्ने बिषय जहाँ पनि हुन्छ’ ।
तर,भौतिक पूर्वाधार मन्त्री बसन्त नेम्वाङले भने राजनीतिक दौडधुपको कारण मन्त्रालयको काम कारवाहीमा ध्यान दिन सकेका छैनन् । उक्त बिषयमा पहिलो चरणको छलफल भएपछि रोकिएको छ ।
विभागले ट्रायल परिक्षाको लागि सय पूर्णाङ्क दिइने र विभिन्न स्टेप तोकेर ६० अंक ल्याउने प्रयोगात्मक परिक्षा पास हुन सक्ने प्रस्ताव तयार गरेको थियो ।
झन्झटिलो र कठिन प्रक्रियाको कारण अधिकांश सेवाग्राही फेल हुने र यातायात कार्यलयमा पुनः परिक्षाको लागि अत्याधिक भीडभाड हुने गरेको विभागको ठम्याइ छ । गत हप्ता मात्रै विभागले लिखित परिक्षा पास भएका ग्राहकको लागि तीन महिनाको समयलाई १८ महिना पुर्याएको छ ।
विभागको प्रस्ताव अनुसार हाल ट्रायल परिक्षामा आठ घुमाउनुपर्ने बाध्यात्मक अवस्था छ । तर नयाँ प्रस्ताव स्वीकृत भएपछि आठलाई विभिन्न चारणमा अंकका आधारमा विभाजन गरिने छ भने यु ट्रन, उकालो ओरालोको प्रक्रियालाईपनि अंकका आधारमै तोकिने तयारी छ ।
सेवाग्राहीका अनुसार सबैभन्दा कठिन स्टेप नै आठ घुमाउनु हाे । अधिकांश सेवाग्राही ट्रायल परिक्षामा आठ मै फेल हुने गरेका छन् । राजनीतिक हलचलका कारण यातायात व्यवस्था विभागको अंक प्रणाली तत्काल स्वीकृत नहुने संकेत देखिएको छ ।
विभागले सो प्रस्ताव तयार पारेपछि कतिपय सेवाग्राही अंक प्रणालीमा ट्रायल परिक्षा सजिलो हुने भन्दै कुरेर समेत बसिरहेका छन् । यो व्यवस्था लागू भएपछि ट्रायल परिक्षामा सक्रिय हुने विचौलिया प्रत्यक्ष प्रभावित हुने बताइएको छ ।
मालपोतपछि सबैभन्दा बढी चलखेल हुने यातायात क्षेत्रमा विभागको सो प्रस्ताव लागूभएको खण्डमा विचौलियासँगै भीडभाडकोपनि अन्त्य हुने विभागले जनाएको छ । यो व्यवस्थाले यातायात क्षेत्रको ठूलो समस्या हलहुने विश्वास लिइएको छ ।
कारोना भाइरस संक्रमणको कारण बन्द भएको लाइसेन्स आवेदन १० महिनापछि खुलेपछि पछिल्लो समय अत्याधिक चाप बढेको छ । सेवाग्राहीले ट्रायल परिक्षा दिनकै लागीपनि चारदेखि पाँच महिना कुर्नुपर्ने बाध्यता छ ।
