सीडीएससीमा अर्थ मन्त्रालयका प्रबक्ता समेत रहेका कृष्णप्रसाद देबकोटाको अध्यक्षतामा हरिप्रसाद काफ्ले र सीताराम थपलिया सदस्य रहेको संचालक समिति क्रियाशील थियो । स्वतन्त्र संचालकको पद भने खाली थियो । अर्थ मन्त्रालयका प्रबक्ता तथा सीडीएससीका निवर्तमान अध्यक्ष देबकोटाले आफु बित्तीय क्षेत्र महाशाखा प्रमुखबाट अनुगमन महाशाखा सरुवा भएकाले सीडीएससीमा फेरबदल भएको जानकारी दिनुभयो । अर्थ मन्त्रालयको बित्तीय क्षेत्र समन्वय महाशाखामा नबराज भण्डारी प्रमुख तोकिएकाले उहाँले नै सीडीएससीको नेतृत्व गर्ने संभावना ब्यक्त गरिएको छ ।
अर्थ मन्त्रालयले सीडीएससी संचालक समितिको कार्यविधि परिवर्तन गर्ने बारेमा पनि छलफल अगाडि बढाएको सुत्रले जनाएको छ ।
अर्थ मन्त्रालयमा फेरबदल भए पनि सीडीएससीको संचालक समितिका अरु पदाधिकारीको बारेमा भने टुंगो लागि नसकेको बताईन्छ । नेपाल स्टक एक्सचेन्जका महाप्रबन्धक सिताराम थपलियाले सीडीएससीको संचालक समिति विघटन भएको आफुले पनि सुनेको तर अर्थ मन्त्रालयबाट कुनै पत्र प्राप्त नभएको बताउनुभयो । सीडीएससीका प्रमुख कार्यकारी सुबोध शर्मा सिग्देलले पनि सीडीएससीको संचालक समिति फेरिएको बारे अनभिज्ञता ब्यक्त गर्नुभयो ।
अर्थ मन्त्रालयका प्रबक्ता देबकोटाले सीडीएससी नेप्सेको सहायक कम्पनी भएकाले सोही मान्यता बमोजिम संचालन हुने जनाऊ दिनुभयो ।
सीडीएस कार्यानवयनमा देखिएको अन्योल हटाउन सीडीएससीलाई मुस्किल परिरहेको बेला संचालक समिति फेरिनुलाई अर्थपूर्ण रुपमा हेरिएको छ । शेयर बजारको खस्कदो अबस्थाप्रति चिन्तित रहनु भएका अर्थमन्त्री डा. रामशरण महतले केही दिन यता सुधारको प्रयास तीब्र पार्नुभएको र सोही सन्दर्भमा पछिल्लो निर्णय आएको हुनसक्ने आंकलन गरिएको छ । सीडीएस कार्यान्वयनको प्रभावकारिता देखाउन र लगानीकर्ताहरुलाई आश्वस्त पार्न सीडीएससीमाथि दबाब पर्दै आएको छ ।
नेप्सेमा सुचिकृत कम्पनीका कागजी शेयर प्रमाणपत्रलाई अभौतिक प्रमाणपत्रमा रुपान्तरण गरी पूर्ण रुपमा अभौतिक शेयर प्रमाणपत्रको खरिद बिक्री गराउने काममा सीडीएससीले आगामी माघ २ गतेदेखि चरणबद्द कार्यक्रम लागु गर्दै छ । हाल शेयर खरिद गर्नेहरुले अनिवार्य रुपमा हितग्राही खाता खोली नामसारीमा अभौतिक प्रमाणपत्र मात्र प्राप्त हुने प्रक्रिया संचालनमा रहेको छ । यस क्रममा लगानीकर्ताहरुमा देखिएको अन्योल हटाउँन नसक्दा शेयर कारोबारमा पनि केही अन्योल छ । यही अन्योलले शेयर बजारमा निराशा ल्याउन सहयोग गरेको अनुमान केही लगानीकर्ताले गरेका छन् ।
नेपाल स्टक एक्सचेन्जले सीडीएसका बारेमा देखिएको अन्योल हटाउन छिट्टै विशेष कार्यक्रम संचालन गर्ने भएको छ ।
