डेढ घण्टामा पहिलो सर्किट लागेर बन्द भई कारोबार खुलेको केही समयमा खरिदकर्ताहरु ओईरिए, कुनै कुनै पाँच देखि सातसय मूल्यका कतिपय सेयरमा त आघा घण्टामै मूल्य उचालिएर पहिलेकै ठाउँमा पुग्यो । सर्किट लागेर फेरि बजार खुलेको एक घण्टामा कयौं कम्पनीहरुले आफ्नो अनुहारमा हरिया रंग पोतिसकेका थिए ।
लगानीकर्तालाई झुक्याउने बजारको चाल यस्तो थियो
बीचमा बजार सुधारिएर २८ अंकले मात्र घट्यो तर अन्त्यतिर फेरि घट्दै गएर बजार ५८ अंकले घटेर नेप्से १५९९.६२ मा बन्द भयो । कारोबार रकमको हिसाबले एक अर्ब २४ करोडको सेयर किनबेच हुनु त्यत्ति नराम्रो हैन ।
दीर्घकालीन लगानीको हिसाबले सेयर बजार घटेको बेलामा सेयर किन्न हिम्मत चाहिन्छ भनेर मेरोलगानी डटकमले सर्वसाधारण लगानीकर्तालाई भन्दै आएको हो । सेयर बजार एकोहोरो घटेरै जाँदैन र एकोहोरो बढेरै मात्रै पनि जान्न । घटेको बेला मनोबल उच्च बनाएर किन्ने र मूल्य बढेर फाईदा भएन भने पनि कम्तिमा तीन बर्षसम्म पाल्ने हिम्मत लगानीकर्ताले जुटाउँनै पर्छ । एकैपटक भए भरको पैसा खर्च गरेर सेयर निकिनी सेयर बजार जत्ति घट्दै गयो, उत्ति धेरै राम्रा कम्पनीको सस्तो सेयर किन्दै जाने हो भनिन्छ तर अहिलेको अबस्थामा त घटेको राम्रा कम्पनीको सेयर किन्न कुबेरको धनले पनि नपुग्ने स्थिति आयो । नेप्सेमा घटाईको क्रम सुरु भएपछि समग्र बजार पूँजीकरण दुई खर्बले कमी आई आईतबार १७ खर्ब ७९ अर्बमा झरेको छ । यो चानचुने गुमाई हैन ।
आईतबार एक समय बजार घटाईको अबस्था
आजको भोलि फाईदा हुन्छ भनेर सेयर बजारमा लगानी गर्नेहरुलाई यसरी बजारको घटेको बेला सहनै गाह्रो पर्ने खालको पीडा हुनसक्छ र उनीहरु हतासिएर सेयर बेची घाटा खान्छन् । बजार घटेर सबै भागाभाग गरिरहेको बेला कोही पनि लगानीकर्ता पुराण सुनेर बस्दैनन् । बजार घटाईको चिन्ताले सबैलाई सताएकै छ । त्यसो हुँदा लगानीकर्ताले आफ्नो विवेक र निर्णयमा लगानी गर्नुपर्छ भनेर भनिएको हो । घाटा हुँदा कोही सहयोग गर्न आउँदैनन् र नाफा हुँदा नाफा पनि कसैलाई बाड्नु पर्दैन ।
एभरेष्ट, नेशनल लाईफ, शिखर जस्ता कम्पनीको धेरै रकमको सेयर कारोबार हुनुले ठूला लगानीकर्ता अझै ती कम्पनीको सेयर किनबेच गरिरहेका छन् छन्ने देखिएको छ । ती सेयरहरु ठूला लगानीकर्ताले नै किनेका हुन् । यो क्रम केही दिनदेखि चलिरहेकै छ ।
अहिले सेयर बजार घट्नुमा धेरै कारणहरु हुनसक्छन् र ती कारणहरुलाई पुष्टि गर्न चलाईने हल्लाहरुको पनि महत्वपूर्ण भुमिका हुनसक्छ । हकप्रदको ओईरोले पारेको प्रभाव, नाफा सुरक्षित गर्ने प्रबृत्ति, बजारमा सकारात्मक भन्दा नकारात्मक कुराहरुको चर्चा बढी, लगानीकर्ताको आत्मबल कमजोर हुनु, सेयर माग भन्दा आपुर्ति बढी, संस्थागत र ठूला लगानीकर्ताको रमिता हेराई, अर्थतन्त्रको अबस्था लगायतका कारणहरु खोतल्दा पनि थाम्नै नसक्ने गरी पहिरो जानुपर्ने चाँही हैन । सबैैभन्दा ठूलो कुरो लगानीकर्ताको मनस्थिति नै कमजोर हुनु र केही पक्षहरु त्यसलाई अझ कमजोर पार्नेतर्फ लाग्नु हो ।
नेपाल राष्ट्र बैंकले बैंक तथा बित्तीय संस्थाहरुको पूँजी बृद्धिको योजना ल्याएपछि धेरै बैंकहरु मर्ज वा खरिद बिक्रीमा जान्छन् भन्ने अनुमान गरिएको थियो । तर त्यस अपेक्षा विपरित धेरै संस्थाका संस्थापक र संचालकले आफै पूँजी पुर्याउँछु भन्दै हकप्रदलगायतका औजारहरु चलाए, त्यसले उनीहरुको गानो गएको छ । त्यसमाथि हकप्रद आबेदन गर्दा संस्थापकले रकमको प्रमाणित स्रोत सम्बन्धी कागाजात पेश गर्नुपर्ने भएपछि उनीहरु हावाकावा गरिरहेका छन् ।
एउटा उदाहरण हेरौं, संस्थापकहरुले हकप्रदको रकम जुटाउन नसक्दा सेवा बिकास बैंकले स्वीकृति पाएको धेरै पछि सेयरधनी दर्ता किताब बन्दको सूचना निकाल्नु र कैलास बिकास बैंकले संस्थापकहरुको रकम जुटाउनै नसकेर धितोपत्र बोर्डलाई जवाफ लेख्नै नसकेको अबस्था छ । सेन्चुरी लगायतका केही बाणिज्य बैंकहरुका संस्थापकले पटक पटक हकप्रद हाले पनि आठ अर्ब पुर्याउन अझै कति हकप्रद हाल्नुपर्ने हो भनी आत्तिएको अबस्था छ । मेघा, सिभिल, जस्ता बैंकहरुले कसरी आठ अर्ब पुरयाउने अहिले नै भन्न सकिने अबस्था छैन । एभरेष्ट, एसबीआई जस्ता सेयर मूल्य धेरै भएका बैंक र बिमा कम्पनीहरुको हकप्रदको ओईरो लाग्ने स्पष्ट भईसकेको छ । साना संस्थाहरुलाई झन् सकस परेकै छ ।
यसरी हेर्दा एफपीओ र हकप्रदले नै सेयर बजारलाई धक्का दिन्छ भन्ने आँकलन सही सावित भयो । बजार स्पष्ट रुपमा घट्ने क्रममा जान्छ भन्ने बिश्लेषण गरी अझै घटोस भनेर धुप हाल्दै बसेका संस्थागत लगानीकर्ता, सामुहिक लगानी कोष र ठूला लगानीकर्ताहरुलाई अहिले कसैले सेयर किन भनी आदेश दिन सक्दैनन् । सेयर मूल्य घट्छ भनेर जान्दाजान्दै कसैले पनि लगानी गरेर घाटा खाँदैन, सामुहिक लगानी कोषहरुले त झन् जोखिम मोलेर जनताको पैसा चलाईरहेका छन् । कोष घाटामा गयो भने उनीहरुलाई भरथेग गरिदिने कोही हुन्न । त्यसैले उनीहरुले अहिले बजारमा देखिएको जोखिम उठाउँदैनन् ।
त्यसैमा अहिलेको बजार धेरै उतार चढावपूर्ण छ । एकैदिन ८० अंकले घटेको बजार फेरि सुधारिएर २६ अंकले
मात्र घटेर अन्त्यमा ६० अंकले नै घट्छ भने अब यसै हुन्छ भनेर कुनै बिश्लेषकले पनि भन्न सक्दैन । अघिल्लो साताको अन्तिम दिन ४१ अंकले बजार घट्दा यस आईतबार बजार सुध्रिन्छ भनेर कसैले यकिनसाथ भन्न सकेको थिएन । बजारको आफ्नै नियम हुन्छ, साना, ठूला उतार चढावहरु आई नै रहन्छन् । यसलाई यही अर्थमा बुझेर आफ्नो लगानीको सुरक्षामा ध्यान दिनु नै बुद्धिमानी हुनेछ । हल्ला र हकप्रदको भरमा मूल्य उचालिएका कम्पनीमा गरिएको लगानी फिर्ता गरी बलियो, राम्रो र धेरै मूल्य घटेको कम्पनीको सेयरमा लगानी गर्नु नै अहिलेको आबश्यकता हो ।
सामान्य ढंगले लगानीकर्ताको मनोबल उच्च हुन पनि सक्दैन भन्ने देखियो । लगानीकर्ताहरुले यो समयमा सकेसम्म सेयर आपुर्ति कम गरी गंभीर खालका पहिरो रोक्न आफै पहल गर्नसक्छन । मार्केट डेब्थमा सकेसम्म कम सेयर बिक्रीमा देखाएर बजारलाई सन्तुलनको अबस्थामा राख्ने भुमिका खेल्न सकिएन भने आफ्नो लागि आफैले खाल्डो खनेको हुनेछ ।
अहिलेको बजारमा सेयर आपुर्तिलाई कम गराउन नसकेमा आईतबार सर्किट लाग्ने गरी गएको पहिरो फेरि रोक्न सकिदैन । आम लगानीकर्ताको मनस्थिति परिवर्तन र बिषयान्तर गर्ने खालको ठूला कुराहरु आउनु पनि उत्तिकै जरुरी छ । अस्थिर अबस्थामा केही दिनसम्म साना ठूला पहिरोको संभावनाहरु जिवितै देखिन्छ । मनोबल खस्काउने खालको थप समाचार आयो भने परिस्थिति झन् गंभीर नहोला भन्न सकिन्न । सेयर बजारको अहिलेको संबेदनशिलता सम्बद्ध सबैले बुझ्नु जरुरी छ ।
................................................................................................................................................................
मेरो लगानी अब सबै स्मार्टफोनमा ! एण्ड्रोइड मोवाइल एप्सका लागि यहाँ क्लिक गर्नुहोस् । एप्पलको आइफोन तथा आइप्याडका लागि यहाँ क्लिक गर्नुहोस् । तपाईँ मेरो लगानीका प्रत्येक अपडेट फेसबुक, ट्वीटर र गुगल प्लस मार्फत पनि पाउन सक्नुहुन्छ ।