नेपाल लाइफले यस अवधिमा प्रतिशेयर आम्दानी १४ रुपैयाँ १३ पैसा कायम गरेको छ । कम्पनीको विमांकीय मूल्यांकनपछि प्राप्त हुने आम्दानी बाहेक नै यो आम्दानी गरेको जनाएको छ । यसको प्रतिशेयर नेटवर्थ भने १२९ रुपैयाँ १६ पैसा रहेको छ ।
दुई अर्ब १६ करोड चुक्ता पूँजी रहेको नेपाल लाईफको जगेडा कोषमा ४० करोड ६९ लाख रुपैयाँ छ । उसको जीवन बिमा कोषमा ३५ अर्ब १७ करोड रुपैयाँ पुगेको छ जुन अघिल्लो आर्थिक बर्षको दोस्रो त्रैमासको तुलनामा झण्डै २ अर्बले बढी हो । कम्पनीले महाविपत्ती कोषमा २२ करोड ४९ लाख जगेडा राखेको छ ।
कम्पनीले यसअवधिमा ४ अर्ब ८५ करोड खुद बिमा शुल्क आर्जन गरेको छ । अघिल्लो आर्थिक बर्षको यसै अवधिमा २ अर्ब ६६ करोड मात्रै थियो । नेपाल लाइफले यस अवधिमा दश लाख ९ हजार विमा लेख जारी गरेको छ । दावी भुक्तानी तर्फ गत बर्षको यसै त्रैमाससम्म ६० करोड रहेकोमा यस बर्ष एक अर्ब २४ करोड नाघेको छ । कम्पनीले यसअवधिमा ३७ करोड ७१ लाख रुपैयाँ दावी भुक्तानी गर्न बाँकी छ ।
नेपाल लाईफले झण्डै ३१ लाख कित्ता थप नयाँ साधारण सेयर अर्थात एफपीओ जारी गरीसकेको छ । जसको बाँडफाँट हुन बाकी छ । एफपीओ बाँडफाँट पश्चात कम्पनीको चुक्ता पूँजी झण्डै दुई अर्ब ५० करोड पुग्ने छ ।
नेपाल लाइफले गतबर्षको कमाईबाट ६१ करोड ९२ लाख ८५ हजार ७२५ रुपैयाँ बराबरको बोनस सेयर तथा कर प्रयोजनका लागि ३ करोड २५ लाख ९३ हजार ९८६ रुपैयाँ कर प्रयोजनका लागि नगद लाभांस वितरण गर्ने जनाएको छ । करसहति कम्पनीले ३०.०८ प्रतिशत लाभांस बाड्ने प्रस्ताव गरेको हो ।
केहीसमय अगाडी जारी गरेको एफपीओलाई समेत बोनस दिदा बोनस अनुपात २६.३१ प्रतिशत कायम हुने कम्पनीले प्रष्ट पारेको छ ।
