राष्ट्र बैंकले तोकेको आठ अर्ब चुक्ता पुँजी पुर्याउन लक्ष्मीले प्रोफेसनल दियालो विकास बैंकलाई गाभेपछि कायम चुक्तापूँजीको शतप्रतिशत हकप्रद जारी गर्ने भएको हो । प्रोफेसनल दियालोलाई गाभेको बैंकले माघ दुईगतेबाट एकिकृत कारोबार समेत थालिसकेको छ ।
बैंकले तीन अर्ब १५ करोड ९० लाख ३० हजार तीन सय रुपैयाँको तीन करोड १५ लाख ९० हजार ३ सय ३ कित्ता हकप्रद सेयर जारी गर्ने भएको हो । हाल लक्ष्मी बैंकको चुक्ता पूँजी ३ अर्ब ३ करोड रुपैंयाँ रहेको छ । बैंकले २४ करोड चुक्ता पूँजी रहेको प्रोफेसनल दियालो विकास बैंकलाई एक्वायएर र त्यस पश्चात कायम पूँजीबाट शतप्रतिशत हकप्रद जारी गरेपछि बैंकको पूँजी ६ अर्ब ३० करोड रुपैयाँको हाराहारीमा पुग्नेछ ।
त्यस्तै, बैंकले गत वर्षको कमाईबाट लगानीकर्तालाई ३८ प्रतिशत बोनस सेयर दिने घोषणा गरेको छ । हकप्रद भर्नेले पनि बोनस सेयर दिने भएकाले लगानीकर्ताले पाउने वास्तविक बोनस दर भने १८.२९५ मात्र हुन आउँछ ।
लक्ष्मीले चालु आर्थिक वर्षको दोस्रो त्रैमाससम्म आइपुग्दा ४० करोड ६३ लाख ९३ हजार रुपैयाँ खुद नाफा कमाएको छ ।
हकप्रद शेयर बिक्री तथा निष्कासनको जिम्मेवारी सिद्धार्थ क्यापिटल लिमिटेडले पाएको छ ।