नेप्सेले सिद्धार्थ बैंकको ३० प्रतिशत हकप्रदको सेयरमूल्य समायोजन गरेको छ । बैंकले जारी गर्न लागेको ३० प्रतिशत हकप्रदलाई समायोजन गरी ५३८ रुपैयाँ समायोजित मूल्य निर्धारण गरिएको छ । बैंकको पहिलो कारोबार मंगलबार प्रतिकित्ता ५३८ रुपैयाँबाट सुरु भएको छ । जसको औसत आधार मूल्य ६३९ रुपैयाँ निर्धारण गरिएको छ ।
बैंकले लक्ष्मी क्यापिटल मार्केट मार्फत एक सय रुपैयाँ अंकित दरको एक करोड ५७ लाख ५२ हजार ५७८ कित्ता हकप्रद सेयर जारी गर्नेछ । ५ अर्ब २५ करोड चुक्ता पूँजी रहेको बैंकको ३० प्रतिशत हकप्रदपछि ६ अर्ब ८२ करोड ६१ लाख रुपैयाँ चुक्ता पूँजी पुग्नेछ । बैंकले चालु आर्थिक वर्षको तेस्रो त्रैमासमा ९५ करोड ७० लाख रुपैयाँ खुद नाफा कमाएर प्रतिसेयर आम्दानी २४ रुपैयाँ ३० पैसा कायम गरेको छ ।
उता नेप्सेले मंगलबार नै १२ प्रतिशत हकप्रदलाई समायोजन गरी माछापुच्छ्रे बैंकको समायोजित मूल्य ३८० रुपैयाँ निर्धारण गरेको छ । बैंकको पहिलो कारोबार मंगलबार प्रतिकित्ता ३८० रुपैयाँबाट सुरु भएको छ । जसको औसत आधार मूल्य ४३३ रुपैयाँ निर्धारण गरिएको छ ।
बैंकले एनएमबि क्यापिटल मार्फत दश बराबर एक दशमलव दुई कित्ताको अनुपातमा एक सय रुपैयाँ अंकित दरको ७९ लाख १८ हजार ४४० कित्ता हकप्रद सेयर जारी गर्देछ । ६ अर्ब ५९ करोड चुक्ता पूँजी रहेको बैंकको १२ प्रतिशत हकप्रदपछि चुक्ता पूँजी ७ अर्ब ३९ करोड रुपैयाँ नाघ्नेछ ।
बैंकले चालु आर्थिक वर्षको तेस्रो त्रैमासमा एक अर्ब ५६ लाख रुपैयाँ खुद नाफा कमाएर प्रतिसेयर आम्दानी २४ रुपैयाँ ६९ पैसा कायम गरेको छ ।
