नेपाल राष्ट्र बैंकका अनुसार अहिले बैंकिङ क्षेत्रमा ६५ अर्ब रुपैयाँ बराबरको तरलता रहेको छ । राष्ट्र बैंकका प्रवक्ता नारायण प्रसाद पौडेलले पछिल्लो दिनहरुमा तरलताको अवस्थामा केही सुधार आएको बताए । केहिदिन अगाडि ६२/६३ अर्ब हाराहारीमा रहेको तरलता अहिले ६५ अर्बको हाराहारीमा पुगिसकेको छ । यो अनिवार्य तरलता मौज्दात (सिआरआर) वाहेक हो, पौडेलले भने ।
बैंकहरुमा लगानीयोग्य रकमको चरम अभाव भएर हाहाकार मच्चिएको बेला केही समय अघि बित्त बजारमा तरलताको अबस्था १० अर्ब हाराहारीमा खुम्चिएको थियो ।
चालु आर्थिक वर्षको सुरुवातमा बैंक तथा वित्तीय संस्थाहरु अधिक तरलताको समस्यामा थिए । तर बर्षको मध्यमा निक्षेप संकलनको तुलनामा कर्जाको वृद्धिदर उच्च भएपछि बैकिङ क्षेत्रमा लगानी योग्य रकमको अभाव देखिएको थियो । जसकारण निक्षेप बढाउने चाप परेपछि बैंकहरुबीच ब्याजदर बढाउने प्रतिस्पर्धा चलेको थियो ।
सानिमा बैंकका प्रमुख कार्यकारी अधिकृत भुवन दाहालले पछिल्लो समयमा बैंक तथा वित्तीय क्षेत्रमा तरलताको अवस्था सुधारउन्मुख रहेको बताए । आर्थिक बर्षको अन्तिम महिना असारमा कर्जा प्रवाह कम हुने र निक्षेप बढ्ने भएकाले पनि तरलताको स्थितिमा सुधार आएको उनले बताए ।
साथै बैंकहरुले मुद्यति निक्षेपको ब्याजदर समेत घटाउदै लगेको उनले उल्लेख गरे । निक्षेप बढेपछि बैंकहरुले नयाँ कर्जामा समेत केही ब्याजदर खुकुलो बनाउन थालेको दाहालको भनाई छ ।
अहिले तरलताको अवस्था सहज हुन थालेपछि बैंकहरुलाई ब्याजदर घटाउने दबाब परेको छ ।
बैंकहरुबीच सुरु भयो ब्याज दर घटाउने तीब्र प्रतिस्पर्धा, हेर्नुहोस, कसले कति घटाए ?
निक्षेप संकलन र कर्जा विस्तारबीच तालमेल नमिल्दा बैंकिङ क्षेत्रमा तरलताको समस्या उत्पन्न हुने गर्छ । बैंकिङ प्रणालीमा रहेको अधिक तरलता व्यवस्थापन गर्न राष्ट्र बैंकले रिभर्स रिपो, निक्षेप बोलकबोल लगायतका मौद्रिक उपकरण जारी गर्दै आएको छ ।
बैंक तथा वित्तीय संस्थाहरुले मनपरी ढ्रंगले व्याजदर वृद्धि गरेपछि राष्ट्र बैंकले स्प्रेड दरमा समेत कडाई गर्ने तयारी गरेको छ । राष्ट्र बैंकले आगामी आर्थिक वर्षको मौद्रिक नीतिमार्फत कर्जा निक्षेपबीचको अन्तर अर्थात स्प्रेड दर घटाउने तयारी गरेको हो । हाल स्प्रेड रेट पाँच प्रतिशत रहेको छ ।
