नबिलले जोखिम ब्यवस्थापनका सबै उपाय अबलम्बन गरी निक्षेप संकलन र कर्जा बिस्तार गरेर खुद नाफा कमाईमा उल्लेखनीय बढोत्तरी गरेको छ । अरु बाणिज्य बैंकहरुले तछाड मछाड गर्दै निक्षेप र कर्जाको ब्याज बढाएर कोषको लागत धान्नै नसक्ने अबस्थामा पुर्याएपनि नबिल भने आफ्नै सुरमा रह्यो । उसको कोषको लागत २.७० प्रतिशत मात्र रहँदा आठ अर्ब ६ करोड ब्याज आम्दानी गरेकोमा दुई अर्ब ६० करोड मात्र ब्याज खर्च गर्नुपर्यो ।
कर्मचारी र संचालन खर्चलाई धेरै बढ्न नदिनुका साथै निस्क्रिय कर्जालाई तल झारेर बैंकले ठूलो, सबल र सक्षम बैंकको परिचय दिएको छ । हुन त नबिलका कर्मचारीहरुले उचित सेवा सुबिधा नपाएको भन्दै आन्दोलन पनि गर्दै आएका छन् ।
केही समय अघि बिबादास्पद बैंकर गुरुप्रसाद न्यौपानेलाई गैरकानुनी कर्जा प्रबाह गरेर बिबादमा आएको भए पनि नबिलले त्यसलाई भित्रभित्रै मिलाएर आफ्नो अबस्था खस्कन दिएन ।
निक्षेप संकलन र कर्जा परिचालनमा राष्ट्रिय बाणिज्य बैंक र ईन्भेष्टमेन्ट बैंकसँग प्रतिस्पर्धामा रहेको उसले ती दुबै बैंकलाई खुद नाफा कमाईमा पनि उछिन्ने संभावना छ । राष्ट्रिय बाणिज्य बैंक र ईन्भेष्टमेन्टले बित्तीय बिबरण प्रकाशन गरेपछि मात्र को अगाडि हुन्छ भन्ने कुरा यकिनसाथ भन्न सकिन्छ ।
संचालन मुनाफा २५ र खुद नाफा २८ प्रतिशतले बढाएको नबिलले प्रतिसेयर आम्दानीलाई पनि सन्तुलनमा राख्ने प्रयास गरेको छ र ५८ रुपैयाँ प्रतिसेयर आम्दानी बाणिज्य बैंकहरुमा सबैभन्दा धेरै हुने संभावना पनि छ ।
नबिलको खुद नाफा मेरोलगानीले आँकलन गरे भन्दा धेरै हो ।
बाणिज्य बैंकहरुले २०७४ मा कति खुद नाफा कमाए ? (आँकलनसहित)
एक बर्षमा ८१ करोडले खुद नाफा बढाउनु चानचुने कुरा हैन । कतिपय बाणिज्य बैंक एक्लैले यत्ति खुद नाफा कमाउन सकेका छैनन ।
गत बर्ष ३० प्रतिशत बोनस सेयर बितरण गरेर पूँजी बढाएको बैंकले यस बर्ष पनि सोही अनुपातमा बोनस बितरण गरी चुक्ता पूँजी आठ अर्ब सजिलै बनाउन सक्छ । चुक्ता पूँजी भन्दा जगेडा कोषको आकार बलियो हुँदा बैंकले लगानीकर्तालाई चाहेको लाभांश बाड्न सक्छ ।
नबिलमा उद्योगपति बिनोद चौधरी र उनको परिवारको ५५ प्रतिशत स्वामित्व छ ।
