नेपाल टेलिकमले गत आर्थिक बर्ष कमाएको १५ अर्ब एक करोड रुपैयाँ नाफाबाट ५५ प्रतिशत नगद लाभांश वितरण गर्ने प्रस्ताव गरेको छ ।
पुस ३० गते डाकेको साधारण सभाका लागि कम्पनीले पुस १२ गतेदेखि बुक क्लोज गर्देछ । कम्पनीले आर्मी अफिर्सस क्लब भद्रकालीमा विहान ११ बजे साधारण सभा बोलाएको छ ।
चालू आवको प्रथम त्रैमासमा कम्पनीले चार अर्ब पाँच करोड ६५ लाख रुपैयाँ खुद नाफा कमाएर प्रतिसेयर आम्दानी १०८ रुपैयाँ १७ पैसा कायम गरेको छ । टेलिकमको सेयर आइतबार प्रतिकित्ता ८५० रुपैयाँमा कारोबार भएको छ ।
उता जलविद्युत्त विकास कम्पनीले गत आर्थिक बर्ष कमाए ४९ करोड नौं लाख रुपैयाँ नाफाबाट ५ प्रतिशत नगद लाभांश वितरण गर्ने प्रस्ताव गरेको छ ।
पुस २८ गते डाकेको छैटाैं बार्षिक साधारण सभाका लागि कम्पनीले पुस १२ गतेदेखि बुक क्लोज गर्देछ । कम्पनीले नक्साल व्याङ्क्वेटमा दिउँसो १ बजे साधारण सभा बोलाएको छ ।
चालू आवको प्रथम त्रैमासमा कम्पनीले २० करोड ७९ लाख रुपैयाँ खुद नाफा कमाएर प्रतिसेयर आम्दानी आठ रुपैयाँ ३२ पैसा कायम गरेको छ । जलविद्युत्त विकास कम्पनीको सेयर आइतबार प्रतिकित्ता १८० रुपैयाँमा कारोबार भएको छ ।
त्यसैगरि नयाँ नेपाल लघुवित्तले गत आर्थिक बर्ष कमाएको ७० लाख पाँच हजार रुपैयाँ नाफाबाट २० प्रतिशत बोनस तथा कर प्रयोजनका लागि १.०५ प्रतिशत नगद लाभांश वितरण गर्ने प्रस्ताव गरेको छ ।
लघुवित्त कम्पनीले बोनसपछि कायम हुने चुक्ता पूँजीको २५० प्रतिशत ( एक बराबर दुई दशमलव पाँच) हकप्रद जारी गर्ने प्रस्ताव समेत गरेको छ । हकप्रदको बुक क्लोज भने कम्पनीले पछि प्रकाशित गर्नेछ ।
पुस २७ गते डाकेको पाँचौं बार्षिक साधारण सभाका लागि कम्पनीले पुस १२ गतेदेखि बुक क्लोज गर्देछ । कम्पनीले होटल जुगल धुलिखेलमा विहान ११ बजे साधारण सभा बोलाएको छ ।
दुई करोड रुपैयाँ चुक्ता पूँजी रहेको कम्पनीको बोनसपछि दुई करोड ४० लाख पुग्नेछ भने २५० प्रतिशत हकप्रदपछि उसको पूँजी ८ करोड ४० हजार कायम हुनेछ ।
चालू आवको प्रथम त्रैमासमा कम्पनीले दुई लाख ६९ हजार रुपैयाँ खुद नाफा कमाएर प्रतिसेयर आम्दानी पाँच रुपैयाँ चार पैसा कायम गरेको छ । लघुवित्त कम्पनीको सेयर आइतबार प्रतिकित्ता ३०५२ रुपैयाँमा कारोबार भएको छ ।