गण्डकी विकास बैंकले हकप्रद जारी गर्न गत मंसिर १५ गते सेयरधनी किताब बन्द गरेको थियो । यसअनुसार मंसिर १५ गतेपश्चात सेयर डिम्याट गर्नेले हकप्रद सेयर प्राप्त गर्न बैंकको सेयर रजिष्ट्रार प्रभू क्यापिटलमा निवेदन पेश गर्नुपर्ने बैंकले जनाएको छ ।
बुकक्लोजभन्दा अगाडि सेयर डिम्याट गराईसकेका सेयरधनीलाई भने बैंकले सेयरधनीकै खातामा हकप्रद वितरण गरेको बताएको छ । बुकक्लोजसम्म अभौतिक सेयर धितो बन्धक राखी सेयर कर्जा लिने सेयरधनीले कर्जा लिएको संस्थाबाट स्वीकृतीपत्र पेश गरेपछि मात्र हकप्रद खातामा जम्मा गरिने जनाइएको छ ।
समयमा नै आफुसँग रहेको सेयर डिम्याट नगराउने सेयरधनीले गण्डकी विकास बैंकमा मात्र अन्य बैंकमा पनि थप झण्झट बेहोर्नुपर्ने निश्चित छ । धितोपत्र बोर्डले सूचीकृत कम्पनीहरुले वितरण गर्ने बोनस तथा नगद लाभांश सेयरधनीकै हितग्राही खाता वा बैंक खातामा नै वितरण गर्न निर्देशन दिएपश्चात अहिले सबै कम्पनीले यसलाई पालना गरिरहेका छन् ।
यसले एकातिर डिम्याट गराएका सेयरधनीलाई सहज भएपनि भौतिक सेयर धारण गर्ने सेयरधनीलाई भने बोनस र नगद लाभांश प्राप्त गर्न सास्ती थपिएको छ ।
गण्डकी विकास बैंकले गत पुस ७ गते देखि माघ ११ गतेसम्म चार बराबर एक अनुपातमा ४६ लाख ९ हजार ८१५ कित्ता हकप्रद जारी गरेको थियो ।
