साताको अन्तिम दिन विहीबार बजार खुल्नासाथ नेप्सेमा झण्डै दोहोरो अंकको सुधार देखियो । सरकारमा रहेका दुई ठुला कम्युनिष्ट पार्टी नेकपा एमाले र माओवादी केन्द्रबीच आजै एकीकरण हुने तयारी चलिरहँदा बजारले बढ्ने बहाना भटेको थियो । तर यो पुरानै कुरा भएकाले सेयरबजारका खेलाडीहरुले यो बिषयलाई उपयोग गर्न सकेनन् ।
केवाईसी नविकरणगरी कारोबारमा संलग्न हुने लगानीकर्ताहरु दैनिक बढ्दै जादा कारोबार रकममा भने केही सुधार देखिएको छ । जसले गर्दा बजारलाई सकारात्मक राख्न पनि मद्यत पुगेको देखिन्छ ।
नयाँ आर्थिक बर्षको नीति तथा कार्यक्रम र बजेट निमार्णको प्रक्रियामा सरकार रहेको छ । लगानीकर्ता त्यसको प्रतिक्षामा रहेकाले पनि कारोबारमा उच्च रुपले बढोत्तरी आउन नसकेको हो ।
सरकारले यही जेठ ७ गते सोमबार नीति तथा कार्यक्रम र १५ गते बजेट सार्वजनिक गर्देछ । बजेटको समय नजिकिदै गर्दा लगानीकर्ता पर्ख र हेरकै अवस्थामा देखिन्छन् । अब केही दिन सेयरबजारमा उतारचढाबको बहाना बजेट बन्ने आंकलन गर्न सकिन्छ ।
अधिकांश कम्पनीहरुले चालु आर्थिक बर्षको तेस्रो त्रैमासको वित्तीय विवरण सार्वजनिक गरीसकेका छन् । सेयरबजारमा वित्तीय विवरणको बहाना लगभग सकिसकेको छ । जसले गर्दा केही दिनयता सेयरबजार स्थिर जस्तो देखिएको छ । विगतका घटनाक्रमहरुलाई हेर्दा सेयर बजारले उकालो वा ओरालो कुन यात्रा तय गर्ने हो त्यसको उपयुक्त बहानाको पर्खाइमा रहेको संकेत गर्छ ।
साताको अन्तिम दिन विहीबार नेप्से १.६४ अंकले बढेर १३३९.६५ अंकमा पुगेको छ । कुल १५४ कम्पनीको कारोबार भएको बजारमा २८ करोड ५४ लाख बराबरको कारोबार भयो । कारोबार रकम अघिल्लो दिनको भन्दा ६ करोड बढी हो ।
यसदिन कारोबार आएका दश समूहमध्ये पाँच समूहका उप सूचक बढेका छन् भने पाँच समूहका घटेका छन् । वाणिज्य बैंक, होटल, विकास बैंक, जलविद्युत र बीमा कम्पनीका सूचक उकालो लाग्दा व्यापार, वित्त, उत्पादन, माइक्रोफाइनान्स र अन्य समूहको सूचक ओरालो लागेको छ ।
विहीबारको बजारमा सबैभन्दा धेरै वोमी माइक्रोफाइनान्सको २ करोड १३ लाख बराबरको सेयर किनबेच भयो । सेयर संख्याका हिसाबले नेपाल बैंकको सबैभन्दा धेरै २७ हजार ७२४ कित्ता कारोबार भयो । कर्णाली विकास बैंकका लगानीकर्ताले सबैभन्दा धेरै पाँच प्रतिशतकादरले कमाउँदा मिसन डेभलपमेन्ट र राधी हाइड्रोका लगानीकर्ताले चार प्रतिशतका दरले गुमाए ।