बैंक तथा वित्तीय क्षेत्र अर्न्तगत नेपाल राष्ट्र बैंकको २२.३ प्रतिशत तथा वाणिज्य बैंकहरुको ५४.९ प्रतिशत योगदान रहेको छ । यस्तै विकास बैंकको ५.९ प्रतिशत, वित्त कम्पनीको १.७ प्रतिशत र लघुवित्त संस्थाहरुको २.३ प्रतिशत योगदान रहेको छ ।
बीमा कम्पनीको ४ प्रतिशत, नागरिक लगानी कोषको २.१ प्रतिशत, कर्मचारी सञ्चय कोषको ५.३ र सहकारी तथा वित्तीय गैर सरकारी संस्थाको एक प्रतिशत योगदान रहेको छ ।
बैंकिङ्ग क्षेत्र र सम्झौता मुलक बचत परिचालन गर्ने संस्थाहरुको कुल सम्पत्ति/दायित्व कुल गार्हस्थ उत्पादन सँगको अनुपात १८१ प्रतिशत रहेको छ ।
२०७४ फागुन मसान्त सम्ममा २८ वाणिज्य बैंक, ३६ विकास बैंक, २५ वित्त कम्पनी तथा ६४ लघुवित्त संस्था गरी १५३ बैंक तथा वित्तीय संस्था सञ्चालनमा छन् ।
यसका साथै नेपाल राष्ट्र बैंकवाट सीमित बैंकिङ्ग कारोबार गर्न इजाजत प्राप्त १४ सहकारी र २४ गैरसरकारी संस्था सञ्चालनमा रहेका छन् ।
साथै ३९ बीमा कम्पनी, कर्मचारी सञ्चय कोष, नागरिक लगानी कोष र हुलाक बचत बैंक लगायतका संस्थाहरु सञ्चालनमा रहेकाे प्रतिवेदनमा उल्लेख गरिएकाे छ ।
