कुर्सी विवादले सेयर बजारको फ्रण्टलाइन रेगुलेटर नेप्सेमा अब के होला भन्ने चासो लगानीकर्तामा बढेको छ ।
सर्वोच्च अदालतको अन्तरिम आदेश पाएपछि काममा फर्किएका प्रमुख कार्यकारी अधिकृत चन्द्रसिंह साउदलाई नेप्से सञ्चालक समितिका अध्यक्ष लक्ष्मण न्यौपानेले हाजिर हुन रोक्दा विवाद उत्पन्न भएको हो ।
साउदलाई अर्थमन्त्रालयको निर्देशन अनुसार काममा रोक लगाइएको स्रोतको भनाई छ ।
मेरोलगानीसँग कुरा गर्दै नेप्सेका अध्यक्ष लक्ष्मण न्यौपानेले भने, 'अहिले म अर्थमन्त्रालयमा छलफलमा छु । यस सम्बन्धमा मैले केही बोल्न सक्दिन । पछि कुरा गरौंला ।'
उता प्रमुख कार्यकारी अधिकृत साउदले मेरोलगानीसँग भने, 'म कार्यालय जाने तरखर गर्दै गर्दा अध्यक्षज्यूले फाेनबाट कार्यालय आउन हतार नगर्नु भन्नु भयो । भएको के हो, अलमलमा छु ।'
उता नेप्सेमा अनलाइन प्रणाली इन्टिग्रेट गर्ने क्रममा प्राविधिक समस्या समेत बल्झिएको छ । जसले गर्दा बजार खुलेको एकघण्टा वित्दा समेत नेप्सेको वेवसाइट सुचारु हुन सकेको छैन । हजारौं लगानीकर्ता सेयर बजारको प्रत्यक्ष सूचना लिएर कारोबार गर्नबाट बञ्चित भएका छन् ।
प्राविधिक समस्या सुल्झाउने प्रयास भइरहेको नेप्से स्रोतले जनाएको छ । उसका अनुसार कनेक्टिभिटि लस्टका कारण वेबसाइटमा समस्या आए पनि सेयर कारोबार भने भैरहेको छ ।
