शेयर निष्काशन सम्बन्धि सम्झौतामा जनसेवी लघुवित्तका प्रमुख कार्यकारी कमल बहादुर खत्री र एनएमबि क्यापिटलका प्रमुख कार्यकारी श्रीजेश घिमिरेले हस्ताक्षर गरे ।
लघुवित्तले एक सय रुपैयाँ अंकित मूल्यमा चार करोड २० लाख रुपैयाँ बराबरको चार लाख २० हजार कित्ता आईपिओ जारी गर्नेछ । आइपिओ जारी गरेपछि कम्पनीको चूक्ता पूँजी १४ करोड रुपैया पुग्नेछ ।
२०७२ आश्विन १२ गते नेपाल राष्ट्र बैंकबाट स्वीकृत प्राप्त गरी २०७२ कार्तिक २२ गते पर्वत जिल्लाको कुस्माबाट कारोवार सञ्चालन गरेको यस वित्तीय संस्थाको हाल अधिकृत पूँजी रु. ३० करोड र जारी पूँजी रु. १४ करोड रहेकोमा संस्थापकबाट ९ करोड ८० लाख चुक्ता भईसकेको छ ।
हाल वित्तीय संस्थाको पर्वत, बाग्लुङ्ग, म्याग्दी, गुल्मी, रुकुम, रोल्पा, कास्की, तनहूँ, लम्जुङ्ग र गोर्खा गरी १० जिल्ला कार्यक्षेत्र रहेको छ र हालसम्म २१ वटा शाखा कार्यालय मार्फत रु. १ अर्व १५ करोड भन्दा बढी कर्जा लगानी गरिसकेको छ भने ४२ करोड कर्जा लगानीमा रहेको छ र सदस्यहरुबाट १२ करोड भन्दा बढी निक्षेप समेत संकलन गरेको छ ।
त्यसैगरी यस वित्तीय संस्थाले हालसम्म ११,८०० जना सदस्यहरुलाई लघुकर्जाको सेवा प्रदान गरेको छ । चालु आर्थिक वर्षको पौष मसान्तभित्रमा नै शेयर जारी गरीसक्ने वित्तीय संस्थाले जनाएको छ ।
लघुवित्तले गत आर्थिक बर्षमा ६० लाख ५२ हजार रुपैयाँ खुद नाफा गरेको छ । चालु आर्थिक बर्षमा संस्थाले थप ६ जिल्लामा गरी कुल शाखा संञ्जाल ३२ पुर्याउने लक्ष्य राखेको छ ।
