माउन्टेन हाइड्रो पावरको सेयर बिक्री प्रबन्धक सिद्धार्थ क्यापिटलले कूल निष्काशन भएको १२ लाख ५० हजार कित्ता सेयरमध्ये रितिपूर्वक आवेदन दिने आवेदकहरुलाई ६ लाख ८३ हजार ७९० कित्ता शेयर भदौ १० गते आइतबार बाँँडफाँड गरिएको जनाएको छ ।
कम्पनीले जारी गरेको सेयरमध्ये पाँच लाख ६६ हजार ११० कित्ता सेयरका लागि स्थानीयबाट कुनै आवेदन नपरेको क्यापिटलले जनाएको छ ।
यससँगै अब आयोजना प्रभावितको अवितरित सेयर दोस्रो चरणमा जारी हुने सर्वसाधारणका लागि निष्काशन हुने सेयरमा थपिनेछ । यसअघि १२ लाख ५० हजार कित्ता नै सर्वसाधारण निष्काशन गर्ने तय भएकोमा अब १८ लाख १६ हजार ११० कित्ता सेयर सर्वसाधारणमा जारी हुनेछ ।
कम्पनीले पहिलो चरणमा एक सय रुपैयाँ अंकित दरमा १२ करोड ५० लाख रुपैयाँ बराबरको कूल १२ लाख ५० हजार कित्ता सेयर निष्काशन गरेको थियो । यसमध्ये पाँचथर जिल्लाको फिदिम नगरपालिका र हिलिहाङ गाँउपालिकाको लागि ७ लाख ५० हजार र पाँचथरको अन्य क्षेत्रका बासिन्दाका लागि पाँच लाख कित्ता सेयर जारी गरेको थियो ।
एक अर्ब २५ करोड रुपैयाँ जारी पूँजी रहेको कम्पनीमा १० प्रतिशत आयोजना प्रभावित र १० प्रतिशत सर्वसाधारण तथा ८० प्रतिशत संस्थापक सेयर स्वामित्व सेयर रहनेगरि संरचना तयार गरिएको छ ।
संस्थापक तर्फको एक अर्ब पूँजी चुक्ता भैसकेको छ भने स्थानीय र सर्वसाधारणका लागि आइपिओ जारीपछि एक अर्ब २५ करोड चुक्ता पूँजी पुग्नेछ ।
