प्रभु इन्स्योरेन्सको लिलामी शेयरमा भदौ १७ देखि २४ गतेसम्म आवेदन दिन सकिनेछ । कम्पनीले १५ हजार ८६१ कित्ता संस्थापक समूहको र एक लाख २१ हजार १५४ कित्ता साधारण तर्फको शेयर लिलामीमा ल्याएको हो ।
लिलामी शेयरमा प्रभु क्यापिटल र प्रभु बैंकका शाखाहरु आदर्शनगर विरगञ्ज, जलजलाचोक विराटनगर, मिलनचोक बुटवल, न्यूरोडपोखरा, वीरेन्द्रनगर सुर्खेत, सुर्खेत रोड नेपालगञ्ज, र गोदावरीरोड धनगढीबाट मार्फत बोलपत्र लिन र पेश गर्न सकिने बिक्री प्रबन्धक प्रभु क्यापिटलले जनाएको छ ।
न्यूनतम एक सय रुपैयाँ तोकिएको शेयरमा लगानीकर्ताले दश कित्ताले भाग जाने गरी कम्तिमा सय कित्ताका लागि आवेदन गर्न सक्नेछन् ।
कम्पनीले गत असार ८ गतेदेखि साउन १० गतेसम्म चुक्ता पूँजीको ४६ प्रतिशत हकप्रद बिक्री खुला गरेको थियो । कम्पनीले ३१ लाख ६६ हजार कित्ता हकप्रद शेयर निष्काशन गर्दा रितपुर्वक आवेदन दिनलाई ३० लाख २९ हजार ६६१ कित्ता हकप्रद बाँडफाँड गरिसकेको छ ।
गत आर्थिक वर्षमा २२ करोड १५ लाख रुपैयाँ नाफा गरेको कम्पनीको हालको पूँजी अनुसार प्रति शेयर आम्दानी ३२ रुपैयाँ र प्रतिशेयर नेनटवर्थ २१४ रुपैयाँ छ । कम्पनीकाे सेयर बिहीबार प्रतिकित्ता ४७४ रूपैयाँमा काराेबार भएकाे छ ।
